Abşeron ərazisində yerləşən karbamid zavodunda süni intellektdən istifadə olunmaqla enerji effektivliyi proqramlarına start verilib.

“İki sahil” xəbər verir ki, bunu Azərbaycan Dövlət Neft Şirkətinin (SOCAR) vitse-prezidentinin müavini Teymur Quliyev Milli Məclisin Təbii Ehtiyatlar, Energetika və Ekologiya Komitəsində keçirilən ictimai dinləmədə bildirib.

Onun sözlərinə görə, bu proqram pilot layihə kimi həyata keçirilir: "Layihə çərçivəsində tətbiq edilən texnologiyalar inkişaf etdirildikdən sonra digər zavodlarda da tətbiq olunacaq".

Xatırladaq ki, “SOCAR Karbamid” zavodu Sumqayıt Kimya Sənaye Parkının ərazisində yerləşir. Zavod 2019-cu il yanvarın 16-da istifadəyə verilib, il ərzində 435 milyon kubmetr təbii qazdan xammal kimi istifadə etməklə 650-660 min ton karbamid istehsal etmək gücündədir. İstehsal həcminin 70 %-i ixrac üçün nəzərdə tutulub.