ABŞ Müdafiə Nazirliyi "Carl Vinson" təyyarədaşıyan gəmisinin başçılıq etdiyi aviadaşıyıcı zərbə qrupunu Mərkəzi Komandanlığın (CENTCOM) məsuliyyət zonasına köçürür.

“İki sahil” xəbər verir ki, bu barədə Pentaqonun rəsmi nümayəndəsi Şon Parnell deyib.

"Hind-Sakit Okean regionunda planlaşdırılmış təlimlər başa çatdıqdan sonra, "Carl Vinson" təyyarədaşıyan gəmisinin başçılıq etdiyi aviadaşıyıcı zərbə qrupu regional sabitliyi təşviq etmək, təcavüzün qarşısını almaq və regional ticarət yollarını qorumaq üçün CENTCOM zonasına gələcək", - deyə o bildirib.

O qeyd edib ki, bu vəzifələri yerinə yetirmək üçün və “Prezidentin güc yolu ilə sülhə nail olmaq göstərişinə uyğun olaraq” müdafiə nazirinin əmri ilə “Harry S. Truman” aviadaşıyıcısının başçılıq etdiyi aviadaşıyıcı zərbə qrupu regionda qalır.

CENTCOM-un məsuliyyət zonasına Yaxın Şərq, Şərqi Afrika və Mərkəzi Asiya daxildir.