Martın 28-də Ukrayna ABŞ-dan nadir torpaq metalları üzrə sazişin yeni mətnini alıb. Sənəd üzrə iş hələ davam edir.

“İki sahil” xəbər verir ki, bu barədə Ukraynanın xarici işlər naziri Andrey Sıbiqa litvalı həmkarı Kastusis Budris ilə birgə mətbuat konfransı zamanı deyib: “Martın 28-də xarici işlər nazirliyi diplomatik kanallar vasitəsilə ABŞ tərəfdən mineral ehtiyatlar üzrə sazişin yeni mətnini alıb. Məlum olduğu kimi, Kiyev əvvəllər müzakirə olunmuş çərçivə sazişini imzalamağa hazır idi. İndi biz sazişin işlənib hazırlanması ilə bağlı təklifi və müvafiq olaraq, onun yeni mətnini aldıq”.

Nazir qeyd edib ki, Ukraynanın bu tip sənədlərin işlənməsi ilə bağlı öz qanunvericiliyi var. Müvafiq olaraq, dövlətdaxili prosedurlara başlamaq üçün lazımi tədbirlər həyata keçirilib.

“Həmçinin təsdiq edirəm ki, biz artıq Amerika tərəfi ilə sazişin mətni üzrə məsləhətləşmələrə başlamışıq. Bu məsləhətləşmələrin bir raundu artıq baş tutub. Ukrayna tərəfi həm ABŞ, həm də Ukraynanın qarşılıqlı milli maraqlarına cavab verəcək sənədi imzalamaq niyyətindədir”, - deyə nazir qeyd edib.

Onun sözlərinə görə, güclü Amerika biznesinin daha da gücləndirilməsini nəzərdə tutan sazişin mətni həm də Ukraynanın təhlükəsizlik infrastrukturuna töhfə olacaq.

“Amerika biznesinin Ukraynada mövcudluğunun gücləndirilməsi həmişə vacibdir. Ona görə də bu proses davam edəcək və biz amerikalı həmkarlarımızla birlikdə qarşılıqlı məqbul mətnin imzalanmasına nail olmaq üçün çalışacağıq”, - deyə Ukrayna XİN rəhbəri vurğulayıb.