Aprelin 4-də Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin publik data portalının təqdimatı və “Dövlət idarəetməsində data əsaslı qərar qəbuletmə” mövzusunda panel müzakirələr keçirilib.
Tədbirdə müxtəlif dövlət qurumlarının və texnoloji şirkətlərin, ali təhsil müəssisələrinin müvafiq sahə üzrə fəaliyyət göstərən nümayəndələri iştirak ediblər.
”ASAN xidmət"in publik data portalında 7 fəaliyyət istiqaməti üzrə açıq məlumatlar təqdim edilir
“ASAN xidmət"in publik data portalının təqdimatını edən Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin Əmək Münasibətlərinin Monitorinqi Mərkəzi müdirinin müavini Murad Fətullayev bildirib ki, “ASAN xidmət"in publik data portalının yaradılmasının məqsədi Dövlət Agentliyinin fəaliyyətinə dair ictimai hesabatlılığın təmin edilməsi, vətəndaşların iştirakçılığını təşviq etmək, akademik və biznes iştirakçılar üçün tədqiqat resursu yaratmaq, beynəlxalq reytinqlərdə ölkənin mövqeyinin yaxşılaşdırılmasıdır.
Onun sözlərinə görə, portal “ASAN xidmət”in müxtəlif istiqamətlərdə, o cümlədən beynəlxalq sferadakı fəaliyyəti, Dövlət Xidmətlərinin Elektron Reyestri, “ASAN viza”, “ASAN ödəniş” “ASAN müraciət” sistemləri, “YAŞAT” Fondu ilə bağlı məlumatları əhatə edir.
"Portalın əsas xüsusiyyətləri məlumatların daim yenilənməsi, fərdi və konfidensial məlumatların qorunması, metadatanın təmin edilməsi, istifadəçi rahatlığının yüksək olması, datanın maşın tərəfindən oxunabilən olması, yüksək keyfiyyətli datadan istifadədir. Tədqiqatçılar və biznes iştirakçıları təqdim olunan datalardan istifadə etməklə fərqli çağırışlara yönəlik yeni innovativ həllər irəli sürə bilərlər", - deyə M.Fətullayev qeyd edib.
Murad Fətullayev vurğulayıb ki, növbəti illər üçün "ASAN xidmət" mərkəzlərinin modernləşdirilməsi və süni intellektin tətbiqinə təşviq sahəsində addımlar atılacaq.
Onun sözlərinə görə, qarşıya qoyulan ən böyük hədəflərdən biri 2026-ci ilə qədər süni intellektin agentliyin fəaliyyətinə aid edilməsidir:"Gündəlik iş müddətində qeydə alınan nöqsanların süni intellekt tərəfindən avtomatik aşkarlanması, çağrı mərkəzlərinin süni intellekt vasitəsilə qeydə alınması və cavablandırılması, vətəndaş axınına nəzarət 2026-cı ilə qədər qarşıya qoyulan hədəflərdir".
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev dövlət idarəçiliyinin səmərəliliyinin artırılmasında data əsaslı qərar qəbuletmə mexanizmlərinin tətbiqinin əhəmiyyətini vurğulayıb, “ASAN xidmət”in bu istiqamətdə gördüyü işlərdən danışıb. Həmçinin müvafiq istiqamətdə qlobal dünyada yeni texnologiyaların, o cümlədən süni intellekt həllərinin vacibliyi diqqətə çatdırılıb.
Ülvi Mehdiyev: "ASAN xidmət" timsalında süni intellekt həllərinin ümumi idarəetməyə necə faydalı olduğunun şahidiyik
Ülvi Mehdiyev “ASAN xidmət"in publik data portalının təqdimat mərasimində qeyd edib ki,"ASAN xidmət" bu illər ərzində ölkə rəhbərliyinin dəstəyi ilə ən yeni texnologiyaların, innovasiyaların dövlət xidmətləri, dövlət idarəetməsi sahəsində tətbiqi ilə bağlı araşdırmalar aparıb və real rejimdə tətbiq edib. Son illər dataların toplanması, idarə edilməsi və onlarla bağlı qərar qəbul edilməsində süni intellektin tətbiqi qlobal dünyada aktual mövzudur. "ASAN xidmət" bu sahədə süni intellekti tətbiq edən ilk dövlət təşkilatlarından biridir.
Onun sözlərinə görə, 2030-cu il süni intellektin qlobal dünyada qlobal oturuşmuş yeri olacaq: "Sürətli inkişaf onu göstərir ki, hər bir dövlət, hər bir cəmiyyət gələcəyin çağırışlarına cavab verə bilmək üçün indidən bu sahədə öz siyasətini müəyyənləşdirməli və həyata keçirməlidir. Çox sevindiricidir ki, Azərbaycan süni intellektin tətbiqinə görə nəinki geri qalmayıb, hətta öndə gedən ölkələrdən biridir. Hansı ki, qanunvericilik aktları, dövlət siyasətinin özünün baxışı bu sahənin inkişaf etdirilməsi ilə bağlıdır. Həmin sahənin inkişafı onu göstərir ki, bu məsələ dövlət rəhbərliyinin diqqətində və nəzarətindədir. Süni intellekt məhsullarının gələcək qlobal iqtisadiyyatda 2030-cu ilə qədər 15-16 trilyon dollar qatqısı olacaq. "Smart city" reytinqlərinə gəlincə, təkcə 2023-cü ildə ağıllı həllər tətbiq edən şəhərlər enerji istehlakına 25 faiz, nəqliyyatın sıxlığına isə 15 faiz qənaət edib. Gələcək illərdə töhfə daha da artacaq. "ASAN xidmət" timsalında süni intellekt həllərinin ümumi idarəetmədə necə faydalı olduğunun şahidiyik. Zaman-zaman "ASAN xidmət"in saytında açıq məlumatları statistika formasında göstərirdik. Lakin strukturlaşdırılmış portal formasında ekspertlər, tədqiqatçılar, startapçılar, gənclər, cəmiyyətin bütün təbəqələri rahatlıqla xidmətin açıq məlumatlarından gündəlik fəaliyyətində istifadə edə bilərlər. Hər hansı bir yeni təklif olarsa, bizə çatdırsınlar ki, gələcəkdə portalı daha funksional və istifadəyönümlü edək".
Tədbirin yekununda “Data əsaslı qərarvermə: mif, yoxsa reallıq?” mövzusunda panel müzakirələr baş tutub. Müzakirələrdə dövlət qurumlarının süni intellekt həllərinin tətbiqi ilə bağlı təcrübələri bölüşülüb.
Yaqut Ağaşahqızı, “İki sahil”
