Azərbaycanın COP29-a ev sahibliyi etməsi ölkənin beynəlxalq arenadakı nüfuzunun və dayanıqlı inkişaf sahəsində atdığı addımların təsdiqi kimi qiymətləndirilir. Konfrans çərçivəsində aparılan müzakirələr və qəbul edilən qərarlar iqlim dəyişikliyi ilə mübarizədə qlobal həmrəyliyin gücləndirilməsinə mühüm töhfə vermişdir. COP29 zamanı inkişaf etməkdə olan ölkələrə texnologiya transferi, maliyyə yardımları və yaşıl enerji təşəbbüslərinin dəstəklənməsi sahəsində mühüm razılaşmalar əldə olunmuşdur.
“Bakı sıçrayışı” ifadəsi məhz bu uğurların ümumiləşdirilmiş simvoluna çevrilmişdir. Azərbaycan ilk dəfə olaraq enerji ixracatçısı ölkədən iqlim lideri ölkəyə doğru strateji mövqe dəyişikliyi etmiş, dünyaya özünün “yaşıl inkişaf” modelini təqdim etmişdir. Konfrans nəticəsində yaradılan yeni fondlar və təşəbbüslər Azərbaycanın qlobal ekoloji gündəmdə aktiv və təşəbbüskar rolunu təsdiqlədi.
Budapeşt Zirvə görüşündə Prezident İlham Əliyev COP29-un uğurları fonunda Azərbaycanın Türk Dövlətləri Təşkilatında oynadığı lider rolunu da ön plana çıxardı. O, çıxışında Türk dünyası ölkələrinin iqlim dəyişmələri ilə mübarizədə birgə səylərinin vacibliyini vurğulayaraq, bu sahədə ortaq platformaların və mexanizmlərin yaradılmasını təklif etdi. Bu çağırış, Türk dünyasının həmrəyliyinin gücləndirilməsi və qarşılıqlı iqtisadi, texnoloji əməkdaşlığın genişləndirilməsi baxımından mühüm əhəmiyyət kəsb edir.
Azərbaycanın təşəbbüsü ilə yaradılan “Türk Dövlətləri Yaşıl Enerji Alyansı” ideyası da görüşdə müzakirə olunmuş və dəstək qazanmışdır. Bu, ölkəmizin yalnız region daxilində deyil, həm də qlobal səviyyədə enerji keçidi və iqlim siyasətində strateji oyunçuya çevrildiyini göstərir.
Budapeşt Zirvə görüşündə Prezident İlham Əliyevin çıxışı bir daha sübut etdi ki, Azərbaycan yalnız öz milli maraqlarını deyil, həm də regional və qlobal sabitliyi, ekoloji təhlükəsizliyi və davamlı inkişafı prioritet sayır. COP29-un uğurla keçirilməsi, “Bakı sıçrayışı” anlayışı və Türk dünyasında əməkdaşlıq təşəbbüsləri Azərbaycanın beynəlxalq arenada artan nüfuzunun, siyasi uzaqgörənliyinin və çevik diplomatiyasının parlaq nümunəsidir.
Azərbaycan bu uğurla Türk Dövlətləri Təşkilatında və daha geniş coğrafiyada öz lider mövqeyini daha da möhkəmləndirmişdir. “Bakı sıçrayışı” yalnız iqlim sahəsində deyil, bütövlükdə Azərbaycanın yeni strateji inkişaf mərhələsinə keçidinin rəmzinə çevrilmişdir.
Elvin Əlizadə,
YAP Sumqayıt şəhər təşkilatının məsləhətçisi
