"Konstitusiya və Suverenlik İli" çərçivəsində Milli Məclis və Vəkillər Kollegiyası (VK) arasında əməkdaşlıq çərçivəsində aztəminatlı şəxslərə pulsuz hüquqi yardımın göstərilməsi ilə bağlı Tərtər rayonunda 97 saylı Tərtər-Ağdərə-Goranboy seçki dairəsinin seçiciləri ilə görüş keçirilib.
Görüşdə 97 saylı Tərtər-Ağdərə-Goranboy seçki dairəsindən deputat Anar Məmmədov, YAP Tərtər rayon təşkilatının sədri Eldar Əsədov, Tərtər Rayon İcra Hakimiyyəti Aparatının məsul əməkdaşı, Vəkillər Kollegiyasının üzvü olan vəkillər və rayon sakinləri iştirak edib.
Yeni Azərbaycan Partiyası Tərtər rayon təşkilatının inzibati binasında təşkil olunan görüşdə hər bir sakinin hüquqi məsələlərə dair problemləri fərdi qaydada dinlənilib və yerində yardım göstərilib.
Müraciətlərin əksəriyyəti inzibati işlər, mülkiyyət hüququ, torpaq mübahisələri, əlilliyin təyin edilməsi, aliment tələbi və digər sosial məsələlərlə bağlı olub.
