ABŞ prezidenti Donald Trampın Rusiya ilə bağlı mövqeyi onun Ukrayna üzrə xüsusi nümayəndəsi Keyt Kelloq və dövlət katibi Marko Rubionun təsiri altında sərtləşib.

“İki sahil” xəbər verir ki,  bu barədə "The Telegraph" öz mənbələrinə istinadla məlumat yayıb. Qəzetin yazdığına görə, onlardan əlavə, anti-Moskva  mövqeyində olan bəzi respublikaçılar da bir neçə aydır ki, prezidenti ritorikasını dəyişməyə sövq etməyə çalışırlar.

“The Telegraph”ın qeyd etdiyi kimi, əvvəlcə Keyt Kelloq Rusiya-Ukrayna münaqişəsinin həllindən faktiki olaraq uzaqlaşdırılıb: o, Ukrayna ilə danışıqlarda ABŞ-ı təmsil edib, lakin əsas vasitəçi rolunu, ilk növbədə, Rusiya ilə ABŞ prezidentinin xüsusi nümayəndəsi Stiv Uitkoff həyata keçirib.

Lakin son həftələrdə Stiv Uitkoff Yaxın Şərq siyasətində fəallaşdı, Keyt Kelloq isə Ukrayna münaqişəsində daha çox rol oynamağa başladı. Mənbələr deyir ki, Marko Rubio çoxdan Rusiyaya qarşı təmkinli olub. Bununla belə, qəzet deyir ki, Rusiyanın Ukraynaya hücumları gücləndikdən sonra dövlət katibi Moskvaya qarşı “yeni yanaşma” irəli sürmək üçün müdaxilə edib.