Anhoy Elm və Texnologiya Universitetinin Birinci Filial Xəstəxanasından (Çin) olan alimlər müəyyən ediblər ki, fastfud, yarımfabrikat ət məhsulları və təmizlənmiş karbohidratlar ürək işemik xəstəliyindən əziyyət çəkən insanlarda ölüm riskini artırır.

“İki sahil” xəbər verir ki, araşdırmada ürək işemik xəstəliyi olan 1303 nəfər iştirak edib. Bu xəstəlik ürək əzələsinin oksigen və qida maddələri ilə uzunmüddətli şəkildə kifayət qədər təmin olunmaması nəticəsində yaranır. İştirakçıların orta yaşı 67 olub, onların təxminən 34 faizi qadınlardan ibarət olub.

Mütəxəssislər iştirakçıların qidalanma vərdişlərini öyrənərək hər biri üçün Pəhriz İltihab İndeksini (Pİİ) hesablayıblar. Bu göstərici iltihabi təsirə malik qidaların istehlak səviyyəsini əks etdirir. Orqanizmdə yüksək iltihab səviyyəsi bütün orqan və toxumalara mənfi təsir göstərir.

Tədqiqat çərçivəsində aparılan orta hesabla 77 aylıq müşahidə dövründə 536 nəfər müxtəlif səbəblərdən dünyasını dəyişib. Nəticələr göstərib ki, sıfırdan yüksək olan hər bir Pİİ göstəricisi ürək işemik xəstəliyində ölüm riskini artırır.

Alimlərin sözlərinə görə, fastfud, sosiska, kolbasa, qənnadı məmulatları və çips kimi yağ və şəkərlə zəngin məhsullar iltihabı gücləndirir. Meyvə, tərəvəz, qoz-fındıq və balıq isə əksinə, orqanizmdə iltihabı azaldır.