Türkiyə energetika nazirinin müavini Əhməd Berat Çonqar Astanada keçirilən Kazenergy Avrasiya Forumunda bildirib ki, Türkiyə 2053-cü ilə qədər emissiyaları xalis sıfıra çatdırmaq niyyətindədir. O bəyan edib ki, bərpa olunan enerji mənbələrinin inkişafı milli dekarbonizasiya strategiyasının əsasını təşkil edəcək.

“İki sahil” xəbər verir ki, bu barədə TASS məlumat yayıb.

Bu gün bərpa olunan enerji Türkiyənin ümumi enerji kompleksinin 61%-ni təşkil edir və bərpa olunan enerji gücü təxminən 73 GVt təşkil edir. Qardaş ölkə bu sahə üzrə dünyada 11-ci yerdədir. Çonqar, 2035-ci ilə qədər Ankaranın bərpa olunan enerji istehsal gücünü 120 GVt-a çatdırmağı planlaşdırdığını vurğulayıb.

2024-cü ildən 2030-cu ilə qədər Türkiyə enerji səmərəliliyinin artırılmasına və tullantıların 20 milyon ton azaldılmasına 20 milyard dollardan çox sərmayə qoyacaq. Bu tədbirlər davamlı enerjiyə keçid və qalıq yanacaqlardan asılılığın azaldılması üzrə kompleks planın bir hissəsi olacaq.

Ölkənin səlahiyyətli orqanları bundan əvvəl növbəti on il ərzində bərpa olunan enerjinin inkişafına təxminən 1 trilyon dollar investisiya yatırmaq planlarını qeyd etmişdilər. Bu, uzunmüddətli enerji balansını təmin etmək və əsrin ortalarına qədər iqlim hədəflərinə çatmaq üçün lazımdır.