Finlandiyanın Laplandiya bölgəsində hökm sürən kəskin soyuqlar minlərlə turistin bölgəni tərk etməsinə mane olub. Əhalisi təxminən 6,2 min nəfər olan Kittilya şəhərində yerləşən yerli hava limanı bir neçə reysi həyata keçirə bilmir.

“İki sahil” xəbər verir ki, bu barədə "Kommersant" məlumat yayıb.

Bildirilir ki, son bir neçə gündür bölgədə temperatur –37°C-dən yuxarı qalxmır. Bu isə uçuş-enmə zolağının, təyyarələrin və digər texniki avadanlıqların xidmətini ciddi şəkildə çətinləşdirir. Sərnişinlərin təhlükəsizliyini təmin etmək məqsədilə hava limanının rəhbərliyi reyslərin təxirə salınması barədə qərar qəbul edib.

Məlumata görə, reysləri ləğv olunan sərnişinlərin əksəriyyəti Milad və Yeni il bayramları üçün Laplandiyaya gəlmiş xarici turistlərdir. Kittilya hava limanı həmçinin turistlərin xizək sürdüyü və şimal işıqlarını (aurora borealis) izlədiyi yaxınlıqdakı kurortlara da xidmət göstərir.

Qeyd edək ki, bu regionda yanvar ayı üçün orta temperatur adətən təxminən –15°C olur. Lakin bu il şaxtalar xüsusilə sərt keçdiyi üçün hava nəqliyyatının fəaliyyəti ciddi şəkildə pozulub.