Avropa İttifaqı (Aİ) qlobal geosiyasi və iqtisadi dəyişikliklər fonunda kritik və nadir metallarla bağlı yeni strateji mərhələyə qədəm qoyur.

“İki sahil” xəbər verir ki, yaşıl enerji keçidi, rəqəmsal texnologiyalar və müdafiə sənayesinin sürətli inkişafı Aİ-ni bu sahədə daha müstəqil və dayanıqlı təminat mexanizmləri qurmağa vadar edir.

Aİ-nin qəbul etdiyi yanaşmaya əsasən, 2030-cu ilədək kritik xammallar üzrə daxili hasilatın artırılması, emal güclərinin genişləndirilməsi və təkrar emal imkanlarının inkişaf etdirilməsi əsas prioritetlər sırasındadır. Strateji məqsəd üçüncü ölkələrdən, xüsusilə də qlobal bazarda dominant mövqeyə malik olan Asiya istehsalçılarından asılılığın azaldılmasıdır.

Bu kontekstdə Rumıniya Aİ-nin diqqət mərkəzinə düşən ölkələrdən biri kimi qiymətləndirilir. Analitiklər qeyd edirlər ki, Rumıniyanın qrafit, maqnezium və mis kimi mühüm xammal ehtiyatları Avropanın sənaye təhlükəsizliyi baxımından strateji əhəmiyyət daşıyır. Lakin vurğulanır ki, geoloji resursların mövcudluğu təkbaşına kifayət deyil. Əsas çağırış həmin xammalın emalı, təmizlənməsi və yüksək əlavə dəyər yaradan sənaye məhsullarına çevrilməsidir.

Mütəxəssislərin fikrincə, Aİ çərçivəsində həyata keçirilən yeni strategiya üzv ölkələrdə sənaye siyasətinin yenidən qurulmasını, lisenziyalaşdırma proseslərinin sadələşdirilməsini və iri həcmli investisiyaların cəlb olunmasını zəruri edir. Bu baxımdan Rumıniyada emal müəssisələrinin yaradılması və texnoloji infrastrukturun gücləndirilməsi ölkəni Avropanın kritik xammal zəncirində mühüm həlqəyə çevirə bilər.

Qeyd olunur ki, nadir metallar uğrunda artan qlobal rəqabət Aİ üçün təkcə iqtisadi deyil, eyni zamanda strateji təhlükəsizlik məsələsidir. Bu səbəbdən Brüssel milli resursların daha səmərəli istifadəsini və üzv ölkələr arasında koordinasiyanın gücləndirilməsini prioritet istiqamət kimi müəyyənləşdirir.