Dünyanın ən varlı insanı Respublikaçılar Partiyasına yenidən qoşulub
Bir müddət əvvəl siyasətdən uzaqlaşacağını bəyan edən milyarder İlon Mask yenidən ABŞ-ın Respublikaçılar Partiyasının əsas strukturlarına on milyonlarla dollar həcmində maliyyə vəsaiti yatırmağa başlayıb. Hazırda dünyanın ən varlı insanı sayılan Mask son illərdə diqqətəlayiq siyasi transformasiya yolu keçib — liberal dəyərlərin simvolu və demokratların müttəfiqindən Donald Tramp administrasiyasının mərkəzi fiqurlarından birinə və respublikaçıların əsas donoruna çevrilib.
“İki sahil” xəbər verir ki, bu barədə "Kommersant" məlumat yayıb.
Lakin Maskın mühafizəkar siyasi olimpdə yüksəlişi uzun sürməyib. Onun Donald Trampla yaşadığı açıq qarşıdurma nəticəsində bu siyasi yüksəliş kəskin şəkildə yarımçıq qalıb. Məhz bundan sonra milyarder siyasətdən çəkiləcəyini açıqlamışdı.
İndi isə vəziyyət dəyişib. Mask Respublikaçılar Partiyasına maliyyə dəstəyini yenidən bərpa edir və bu addım respublikaçıların daxilində yaşanan böhranlar və Donald Trampın reytinqlərinin enməsi fonunda xüsusilə vaxtında atılmış addım kimi qiymətləndirilir.
Milyarderin ABŞ prezidenti ilə mümkün ittifaqının yenidən formalaşması Respublikaçılar Partiyası üçün ciddi siyasi və maliyyə üstünlüyü yarada bilər. Maskın böyük resursları və ictimai təsir imkanları Trampın mövqelərini möhkəmləndirmək baxımından mühüm faktor sayılır.
Beləliklə, İlon Maskın Respublikaçılar Partiyasına qayıdışı ABŞ-da siyasi balanslara yenidən təsir göstərə biləcək əhəmiyyətli hadisə kimi dəyərləndirilir.
