Rusiya prezidentinin mətbuat katibi Dmitri Peskov Baltik dənizində təhlükəsizlik məsələləri ilə bağlı açıqlama verərək bildirib ki, bölgədə gərginliyin artmasına əsas səbəb NATO ölkələrinin hərbi-dəniz qüvvələrinin fəallığıdır. O, Rusiya hərbi donanmasının isə beynəlxalq hüquq normalarına uyğun fəaliyyət göstərdiyini vurğulayıb.

“İki sahil” xəbər verir ki, bu barədə "Kommersant" məlumat yayıb. 

Peskov Almaniya sahilləri yaxınlığında Rusiyanın “Severomorsk” hərbi gəmisinin görünməsi ilə bağlı yayılan məlumatlara münasibət bildirərkən qeyd edib ki, hərbi gəmilərin hərəkət marşrutları barədə məlumat vermək onun səlahiyyətinə daxil deyil. Onun sözlərinə görə, bu məsələlərə Rusiya Müdafiə Nazirliyi və hərbi donanma cavabdehdir.

Rusiya Prezidentinin sözçüsü bildirib ki, son aylarda Baltik regionunda təhlükəsizlik vəziyyətinin gərginləşməsində əsas rol NATO ölkələrinin hərbi fəaliyyətinə məxsusdur. O hesab edir ki, alyansın bölgədə artan hərbi iştirakı ümumi təhlükəsizlik mühitinə mənfi təsir göstərir.

Bundan əvvəl Almaniyanın “Kieler Nachrichten” nəşri Rusiyanın “Severomorsk” esminesinin həftəsonundan etibarən Almaniyanın Femarn adası ilə Lübek körfəzi arasında yerləşdiyini yazmışdı. Alman mediası həmçinin diqqətə çatdırıb ki, bir müddət əvvəl Rusiya Xarici İşlər Nazirliyinin xüsusi tapşırıqlar üzrə səfiri Artyom Bulatov Baltik dənizində Qərb ölkələrindən gələn mümkün təhdidlərə qarşı ticarət gəmilərinin Rusiya Hərbi Dəniz Qüvvələri tərəfindən müşayiət olunmasının nəzərdən keçirildiyini bildirmişdi.

Müşahidəçilərin fikrincə, Baltik dənizi ətrafında artan hərbi aktivlik regionda geosiyasi rəqabətin daha da dərinləşdiyini göstərir. NATO ilə Rusiya arasında münasibətlərin gərgin qalması bölgədə təhlükəsizlik məsələlərini beynəlxalq gündəmin əsas mövzularından birinə çevirib.