İran və bütövlükdə Yaxın Şərq ətrafındakı vəziyyətlə əlaqədar olaraq, may ayında İsveçrə saatlarının ixrac həcmi illik ifadədə cəmi %0,4 artıb. İlin ilk beş ayında isə ümumi ixrac %3,1 azalıb.

“İki sahil” xəbər verir ki, bu barədə məlumatlar İsveçrə Saat Sənayesi Federasiyasının aylıq hesabatında yer alıb.

Federasiya mart ayında ixracın %1,6, apreldə isə %16,6 azaldığını nəzərə alaraq, may ayının göstəricilərini "stabil" adlandırıb. May ayında ixrac edilən 1,2 milyon ədəd saatın ümumi dəyəri 2,1 milyard İsveçrə frankı ($2,6 milyard) təşkil edib. May ayında ən çox qızıl və poladdan hazırlanmış bimetal modellər satılıb ki, onların da ixracı %34 artıb. Lakin bu artım, istehlakçılar arasında daha populyar olan sırf polad modellərə tələbatın azalmasını kompensasiya edə bilməyib.

May ayında ABŞ-yə tədarük həcmi %12,3, Fransaya %57, Böyük Britaniyaya isə %24,9 artıb. Çinə ixrac isə %21,4 azalıb. Yaxın Şərqdəki vəziyyətdən birbaşa təsirlənən BƏƏ-yə saat tədarükü isə %13,5 geriləyib.