ABŞ İsrail Hərbi Hava Qüvvələrinin Suriyadakı aerodroma endirdiyi zərbəni hərbi baxımdan əsaslı hesab etmir və bu addımdan yayınmağın mümkün olduğunu düşünür.

“İki sahil” xəbər verir ki, bu barədə "Axios" portalı amerikalı rəsmilərə istinadla məlumat yayıb.

Vaşinqtonun mövqeyinə görə, Suriya hakimiyyəti son aylar ərzində İsrailə qarşı heç bir düşmənçilik addımı atmayıb, əksinə, ikitərəfli münasibətlərdə deeskalasiyaya nail olaraq təhlükəsizlik sahəsində yeni sazişin bağlanmasına çalışıb. ABŞ həmçinin hesab edir ki, İsrail hakimiyyəti Suriya ilə münasibətlərdə gərginliyi özü artırıb. Bəzi amerikalı diplomatların fikrincə, bu zərbə İsrail parlamentinə keçiriləcək seçkilərlə bağlı ola bilər, çünki hakim koalisiya təhlükəsizlik sahəsində nəticələr nümayiş etdirmək məcburiyyətindədir.

ABŞ diplomatik kanallar vasitəsilə Suriya hakimiyyətini İsrailin addımlarına mümkün cavablar məsələsində təmkinli olmağa çağırıb. Vaşinqton hesab edir ki, yəhudi dövlətindəki seçkilərdən sonra Dəməşqin deeskalasiya üzrə konkret irəliləyiş əldə etməsi daha rahat olacaq.

Portal xüsusi olaraq qeyd edir ki, İsrail Suriya aerodromuna gözlənilən zərbə barədə ABŞ-yə öncədən xəbərdarlıq edib.