Macarıstan hakimiyyəti ABŞ Konqresinə müraciət edərək ölkələrinə qarşı Rusiya neft və qazının əsas alıcılarına qarşı cəza tədbirlərinə imkan verən yeni Amerika sanksiyaları qanununu tətbiq etməməyi xahiş edib.

“İki sahil” xəbər verir ki, bu barədə Macarıstan parlamentinin Xarici əlaqələr komitəsinin sədri Marton Haydu Vaşinqtona səfərinin yekunları üzrə məlumat verib.

Səfər zamanı onun Demokratlar və Respublikaçılar partiyalarından olan qanunvericilərlə görüşləri baş tutub.

Haydu sosial şəbəkə hesabında yazıb: "Mən bütün həmsöhbətlərimdən Macarıstanın Rusiya enerji daşıyıcılarından asılılığın daha da azaldılması və müxtəlif mənbələrdən enerji təchizatının təmin edilməsi istiqamətindəki səylərini dəstəkləməyi xahiş etdim. Bundan əlavə, mən keçid dövründə Macarıstanın Rusiya enerji resurslarının alınması ilə bağlı ABŞ-ın cəza tədbirlərinə məruz qalmaması üçün köməklik göstərilməsini xahiş etdim. Biz macar-amerikan münasibətlərini seçki dövrlərindən kənara çıxan uzunmüddətli maraqlar və ümumi dəyərlər əsasında qururuq".

Komitə sədri dəqiqləşdirib ki, o, ötən həftənin ikinci yarısında ABŞ-ın paytaxtında olub. İyul ayında da o, amerikalı həmkarları ilə görüşmək üçün ora gedib və hələ o zaman Konqresdə hazırlıq mərhələsində olan yeni sanksiyalar qanununun müddəalarının Macarıstanın şamil edilməməsi məsələsini qaldırmışdı.

Sentyabrın 18-də prezident Donald Tramp Rusiyaya qarşı sanksiyaların sərtləşdirilməsi haqqında qanun layihəsini imzalayıb.