Meydanəli Yolçiyev,
YAP Daşkəsən rayon təşkilatının sədri
Dövlət Bayrağı hər bir xalqın milli varlığını, tarixi yaddaşını, azadlıq arzusunu və dövlətçilik ənənələrini özündə əks etdirən müqəddəs rəmzdir. Azərbaycan xalqı üçün üçrəngli bayrağımızın mənası isə daha böyükdür. Bu, əsrlər boyu qorunub saxlanılan müstəqillik idealının, milli birliyin, Vətənə sədaqətin və suveren dövlətə sahib olmağın təcəssümüdür. Noyabrın 9-da qeyd olunan Dövlət Bayrağı Günü xalqımızın bu müqəddəs rəmzə olan sevgisini və ehtiramını ifadə etməklə yanaşı, dövlətçilik tariximizin mühüm səhifələrini də yada salır.
Azərbaycanın üçrəngli Dövlət Bayrağı 1918-ci ildə Azərbaycan Xalq Cümhuriyyəti tərəfindən qəbul edilərək milli istiqlalımızın rəmzinə çevrilmişdir. Bayrağımızın mavi, qırmızı və yaşıl rəngləri xalqımızın milli-mənəvi dünyasını, inkişaf və tərəqqi arzularını, müasir dövlətçilik düşüncəsini ifadə edir. Görkəmli mütəfəkkir Əli bəy Hüseynzadənin irəli sürdüyü türkçülük, müasirlik və islamçılıq ideyaları bu rənglərin ideoloji məzmununu təşkil edir. Beləliklə, üçrəngli bayrağımız tariximizin, mədəniyyətimizin və milli düşüncəmizin ayrılmaz hissəsinə çevrilmişdir.
1920-ci ildə Azərbaycan Xalq Cümhuriyyətinin süqutundan sonra üçrəngli bayrağımız dövlət atributu kimi fəaliyyətini dayandırsa da, xalqımızın yaddaşından silinməmişdir. Müstəqillik ideyası nəsildən-nəslə ötürülmüş, milli dövlətçilik arzusu daim yaşamışdır. 1990-cı il noyabrın 17-də Ümummilli Lider Heydər Əliyevin təşəbbüsü ilə Naxçıvan Muxtar Respublikası Ali Məclisinin sessiyasında üçrəngli bayrağımızın dövlət bayrağı kimi qəbul edilməsi milli tariximizdə dönüş nöqtəsi olmuşdur. Bu qərar Azərbaycanın müstəqilliyə doğru irəlilədiyi mürəkkəb siyasi şəraitdə böyük cəsarət və uzaqgörənlik nümunəsi idi.
Ulu Öndərin siyasi iradəsi və qətiyyətli mövqeyi nəticəsində 1991-ci il fevralın 5-də üçrəngli bayrağımız Azərbaycanın dövlət bayrağı kimi yenidən təsdiq edildi. Həmin il oktyabrın 18-də dövlət müstəqilliyimizin bərpası haqqında Konstitusiya Aktının qəbul edilməsi ilə milli dövlətçilik ənənələrimiz yeni mərhələyə qədəm qoydu. Heydər Əliyevin rəhbərliyi ilə müstəqil dövlət quruculuğunun əsasları möhkəmləndirildi, dövlət atributlarına hörmət və milli ideologiyaya bağlılıq cəmiyyətin mühüm dəyərlərinə çevrildi.
Bu gün Prezident İlham Əliyevin rəhbərliyi ilə Azərbaycan öz müstəqilliyini və suverenliyini daha da möhkəmləndirmiş, beynəlxalq aləmdə nüfuzlu dövlətə çevrilmişdir. Xüsusilə 2020-ci ildə Vətən müharibəsində qazanılan tarixi Qələbə üçrəngli bayrağımızın tarixində yeni və şərəfli səhifə açmışdır. Uzun illər işğal altında qalmış torpaqlarımızın azad edilməsi, həmin ərazilərdə Dövlət Bayrağının ucaldılması xalqımızın milli qürurunu daha da yüksəltmişdir. Şuşada, Cəbrayılda, Füzulidə, Zəngilanda, Qubadlıda, Ağdamda, Kəlbəcərdə, Laçında və digər azad edilmiş ərazilərimizdə bayrağımızın dalğalanması tarixi ədalətin bərpasının əyani ifadəsidir.
2023-cü ilin sentyabrında həyata keçirilən antiterror tədbirləri nəticəsində Azərbaycanın bütün ərazisində dövlət suverenliyinin təmin edilməsi ilə üçrəngli bayrağımız ölkəmizin hər bir guşəsində dalğalanmaq hüququnu və tarixi yerini bir daha təsdiqlədi. Xankəndidə, Xocalıda və digər yaşayış məntəqələrində Dövlət Bayrağının ucaldılması müstəqil dövlətimizin qüdrətinin, milli iradəmizin və ərazi bütövlüyümüzün təntənəsi oldu.
Dövlət Bayrağına münasibət həm də dövlətə, Vətənə və milli dəyərlərə münasibətin göstəricisidir. Azərbaycan Respublikası Konstitusiyasının 75-ci maddəsində hər bir vətəndaşın dövlət rəmzlərinə hörmət etmək vəzifəsi təsbit olunmuşdur. Bu baxımdan bayrağımızın qorunması, onun tarixinin gənc nəslə öyrədilməsi, dövlətçilik düşüncəsinin və vətənpərvərlik ruhunun gücləndirilməsi mühüm əhəmiyyət daşıyır. Bayrağa sevgi yalnız sözlə deyil, dövlətə sədaqət, məsuliyyətli vətəndaş mövqeyi və ölkənin inkişafına töhfə verməklə nümayiş etdirilməlidir.
Prezident İlham Əliyevin qeyd etdiyi kimi, bayrağımız qürur mənbəyimizdir. Bu qürur 44 günlük Vətən müharibəsində döyüş meydanında göstərilən qəhrəmanlıqda, şəhidlərimizin müqəddəs amalında, qazilərimizin fədakarlığında və xalqımızın sarsılmaz birliyində öz ifadəsini tapmışdır. Bu gün üçrəngli bayrağımızın azad edilmiş torpaqlarımızda dalğalanması uğrunda canından keçən qəhrəmanlarımızın əziz xatirəsinə ehtiramın da təcəssümüdür.
Müstəqilliyimiz ən böyük sərvətimiz, suverenliyimiz milli qürur, bayrağımız isə bu dəyərlərin əbədi rəmzidir. Üçrəngli bayrağımızın daim yüksəklərdə dalğalanması Azərbaycan xalqının azadlıq əzminin, dövlətçilik iradəsinin və gələcəyə inamının təntənəsidir. Bu bayraq altında birləşən xalqımız müstəqil Azərbaycanın daha qüdrətli gələcəyi naminə inamla irəliləyir.
