Payız mövsümünə xas olan respirator xəstəliklərin artdığı bir məqamda pandemiyaya qarşı mübarizə ikiqat diqqətli olmağı tələb edir. Bütün dünya dövlətlərini bürüyən, ən güclülərin belə qarşısında aciz qaldığı koronavirusa yoluxanların sayının artması narahatlıq doğurur.
Millətindən, dinindən, qüdrətindən asılı olmayaraq hamı COVID-19-un qarşısında ağ bayraq qaldıranlar çıxış yolları axtarır, peyvəndlərin tapılması istiqamətində axtarışlar intensivləşir, mütəxəssis rəyləri öyrənilir. Epidemioloji vəziyyəti təhlil edən Ümumdünya Səhiyyə Təşkilatının (ÜST) Avropa Bürosunun direktoru Hans Kluge virusa qarşı mübarizə tədbirlərinin daha da gücləndirilməsini, sərt addımların atılmasını zəruri hesab edir. İnsanların ictimai yerlərdə sıxlıq halında toplanmasının, maskasız gəzməyin pandemiyanın yayılmasında rolunu xüsusilə qeyd edən ÜST rəsmisi bildirir ki, pandemiyaya qalib gəlmək üçün hər kəs başqalarına qarşı da diqqətli olmalı, ictimai qınaq halları artırılmalıdır. Müharibə şəraitində yaşayan Azərbaycan vətəndaşları ictimai qınağa xüsusilə diqqət yetirməli, bununla da cəbhədə vuruşan əsgərlərimizə dəstək olmalıdırlar.
ÜST-ün açıqlamasında qeyd olunduğu kimi, virus əleyhinə vaksinanın tapılması haqqında danışmaq tezdir. Avropa bölgəsində 10 gündə virusa yoluxanların sayının 6 milyondan 7 milyona yüksəlməsi Təşkilatın payızda COVID-19-a yoluxma hallarının artacağı barədəki proqnozunu təsdiqləyir. Hazırda başlıca məqsəd insanlar arasında yoluxma hallarının qarşısını almaq, ölümlərin sayını azaltmaqdır. İnsanlarda qorxu, təlaş yaradan virusa qarşı mübarizənin ilk mərhələsi kimi, dövlətlərarası əlaqələr donduruldu, gediş-gəlişə məhdudiyyətlər qoyuldu, bütün ölkələrdə karantin rejimləri, komendant saatları tətbiq edildi. Parklar, küçələr tənhalaşdı. Müxtəlif dillərdə səslənsə də «məsafəni qoru», «evdə qal» kimi xatırlatmalar bütün xalqların əməl etdiyi bəşəri çağırış kimi hamı tərəfindən qəbul edildi. Dövlətlər, insanlar arasında məsafələr uzaqlaşsa da, mənəvi məsafələr yaxınlaşdı, başqalarına dəstək bəşəri ideya kimi genişləndi.
Pandemiyaya qarşı mübarizənin kompleks şəkildə təşkil olunduğu ölkəmizdə ilk günlərdən atılan addımlar, həyata keçirilən məqsədyönlü tədbirlər nəticəsində yeni yoluxma halları nisbətən azalsa da, hazırda bu xəstəliyi göstərən statistik rəqəmlər həyəcan təbili çalır. Nazirlər Kabineti yanında yaradılmış Operativ Qərargahın xəstəliklə bağlı günədlik açıqlaması da göstərir ki, COVID-19-la mübarizədən az itki ilə çıxmaq üçün hər bir vətəndaş nəzərdə tutulan gigiyenik qaydalara əməl etməli, özünü və ətrafındakıları qorumalıdır.
Azərbaycanda koronavirus xəstələrinin müalicəsi üçün ayrılan xəstəxanalarda yaradılan şəraitin nəticəsidir ki, başqa ölkələrə nisbətən ölkəmizdə ölüm halları azdır. Bu da səbəbsiz deyil. İlk günlərdən təhlükənin qarşısının alınması üçün lazımi tədbirlərin görüldüyü ölkəmizdə müasir tipli modul xəstəxanaların açılması, “Yeni klinika”nın, Fövqəladə Hallar Nazirliyinin inşa etdiyi hospitalın istifadəyə verilməsi, xəstəliklə mübarizənin əsas şərtlərindən olan tibbi maskalar, həkimlər üçün nəzərdə tutulan qoruyucu geyimləri istehsal edən müəssisələrin açılması, nəqliyyat vasitələrinin hərəkətlərinə qoyulan məhdudiyyətlər, paytaxtın küçə və meydanlarında, ictimai binaların həyətlərində aparılan dezinfeksiya işləri profilaktik tədbir kimi səmərəsini verir.
Müxtəlif ölkələrdə yaşayan Azərbaycan vətəndaşlarının çarter reysləri ilə Azərbaycana gətirilməsi, onların karantin rejimində saxlanılması təmin edilib. Təsis edilən Koronavirusla Mübarizəyə Dəstək Fonduna toplanılan vəsait xəstəliklə mübarizə istiqamətində görülən işlərə sərf olunur. Ölkəmizə koronavirusun genofonunu öyrənə bilən avadanlıqlar gətirilib.
Təbii ki, koronavirus pandemiyası dünya ölkələrinin iqtisadiyyatına da zərbə vurmuşdur. Azərbaycanda iqtisadi sabitliyi, məşğulluqla bağlı problemləri həll etmək, makroiqtisadi və maliyyə vəziyyətini sabit saxlamaq üçün dövlət tərəfindən xeyli vəsait ayrılmış, pandemiyanın ölkə iqtisadiyyatına, makroiqtisadi sabitliyə, məşğulluq məsələlərinə və sahibkarlıq subyektlərinə mənfi təsirinin azaldılması məqsədilə hazırlanmış Tədbirlər Planında nəzərdə tutulan tədbirlər həyata keçirilir. Tibbi Ərazi Bölmələrini İdarəetmə Birliyinin oktyabrın 21-nə olan məlumatına görə yeni yoluxma hallarının 700-ü ötməsi təhlükənin artan riskindən xəbər verir. Belə ki, hər kəs vətəndaşlıq məsuliyyətini daha da artırmalı, özünə və ətrafındakılara qarşı diqqətli olmalı, «Maska tax, məsafə saxla, gigiyenik qaydalara əməl et» sözlərini unutmamalıdır.
Xuraman İsmayılqızı, «İki sahil»
