Yeni Azərbaycan Partiyası Veteranlar Şurasının üzvü, Milli Məclisin Aqrar siyasət komitəsinin sədri Tahir Rzayevin "yap.org.az"a müsahibəsini təqdim edirik
- Tahir müəllim, Azərbaycanın dövlətçilik tarixinin mühüm dönüş nöqtələrindən biri 1969-cu il 14 iyul tarixində Heydər Əliyevin Azərbaycan Kommunist Partiyası Mərkəzi Komitəsinin birinci katibi seçilməsidir. Bu, respublikamızın SSRİ dövründə inkişafı və intibahının başlanğıc nöqtəsi kimi dəyərləndirilir. Həmin dövrdə Azərbaycanın yüksəlişini təmin edən güclü sosial-iqtisadi və siyasi-ideoloji təməl yaradıldı. Bir sözlə, 1969-cu ildən başlayan inkişaf və rifah yolu Azərbaycanın gələcək tərəqqisinin əsası oldu. Bu barədə nə deyə bilərsiniz?
- Azərbaycanın ictimai – siyasi həyatında baş verən elə mühüm anlar, günlər var ki, onlar tarix boyu unudulmazdır, daim xatırlanır və heç vaxt unudulmayacaqdır. Çünki həmin günlər respublikamızın müqəddəratı, insanların taleyi baxımından əhəmiyyətlidir.
Ulu Öndərimiz Heydər Əliyevin 14 iyul 1969-cu il – Azərbaycan KP MK-nın birinci katibi seçildiyi gün belə bir unudulmaz tarixdir.Respublikamızın inkişafının təməlinin qoyulduğu həmin günün ziyası ilə işıqlanan, tanınan, bugünkü qələbələrə, uğurlara qovuşan Azərbaycan, bəxtiyar xalqımız 14 iyul tarixini daim xatırlamağa, Heydər Əliyevin ömür yoluna, fəaliyyətinə nəzər salmağa borcludur. Qədirbilən xalqımızın öz liderinə, dahi rəhbərinə, dünya şöhrətli şəxsiyyətinə məhəbbəti, ehtiramı onun amallarına, əməllərinə, xidmətlərinə verilən qiymətin ifadəsidir. Çünki Heydər Əliyevin Azərbaycan dövləti, xalqı qarşısındakı xidmətləri əvəzsizdir. Sovetlər ittifaqı dövründə ən geridə qalan, xalqı və iqtisadiyyatı böhranlı vəziyyətdə olan bir respublikanı tez bir zamanda çətin vəziyyətdən xilas edib qabaqcıllar sırasına çıxarmaq, xalqı tanıtmaq məhz Heydər Əliyevin yüksək təşkilatçılıq bacarığı, insanlara qayğısı və diqqəti nəticəsində mümkün olmuşdur.
Ulu Öndərimiz respublikaya rəhbərliyə gəldiyi ilk gündən insanlarda gələcəyə inam yaratmış, mənəviyyat məsələlərini birinci dərəcəli vəzifə kimi qarşıya qoymuşdur. “Xalqı həmişə mənəviyyat birləşdirmişdir. Çünki başqa əsaslara nisbətən mənəvi əsaslar daha üstündür” fikrini Heydər Əliyev əməli fəaliyyətdə həyata keçirdiyi, xalqı birləşdirdiyi, tarixinə, dilinə, dininə, milli – mənəvi dəyərlərinə böyük hörmət və ehtiram bəslədiyi, bunu da xalqa aşıladığı üçün Azərbaycanı tez bir zamanda tərəqqi yoluna qədəm qoymuşdur.
1970-1980-ci illərdə respublikanın neft-qaz hasilatı sənayesinə və neftqayırma zavodlarının yenidən qurulmasına 4 milyarddan çox vəsaitin ayrılması inkişafa təkan verdi və bu günümüz üçün bir zəmin oldu. Həmin illərdə 213 sənaye müəssisəsi tikilmiş, sənaye məhsulları istehsalı 2,7 dəfə artmışdır. Kənd təsərrüfatının ümumi məhsulu 2,7 dəfə, əmək məhsuldarlığı 2,2 dəfə yüksəlmişdir. Respublika iqtisadiyyatının inkişafına 23,9 milyard manat vəsait qoyulmuşdur ki, bu da əvvəlki 50 ildəkindən 1,4 dəfə çoxdur. 849 ümumtəhsil məktəbinin tikilib istifadəyə verilməsi, 6 yeni ali məktəbin yaradılması, C.Naxçıvanski adına hərbi məktəbin açılış, 1155 kitabxananın, 1316 klubun, 44 muzeyin, 111 kinoteatr binasının istifadəyə verilməsi, çoxsaylı mədəni-kütləvi tədbirlərin, görüşlərin, idman yarışlarının keçirilməsi müstəsna əhəmiyyətə malik idi.
- Ümummilli Lider Heydər Əliyevin ölkəmizə rəhbərliyinin ikinci dövrü xilaskarlıq missiyası ilə xarakterizə edilir. Eyni zamanda, həmin dönəmdə görülən işlər Azərbaycanın bugünkü uğurlarının və böyük Zəfər yolunun təməlini qoydu...
- Ulu Öndərimiz ikinci dəfə hakimiyyətə gələndə də öz amallarına, bəşəri ideyalarına sadiqliyini, xalqımıza sonsuz hörmət və sədaqətini inamla nümayiş etdirdi. 1993-cü ildə ölkəni vətəndaş müharibəsindən, qardaş qırğınından xilas etdi. Tez bir zamanda vətəndaş həmrəyliyi yaratdı, silahlı quruplaşmaları neytrallaşdırdı, xaosun, özbaşınalığın qarşısını aldı.
“Əsrin müqaviləsi” iqtisadi inkişafa yol açdı. Torpaq islahatları həyata sahibkarlığın inkişafına təkan verdi. Beynəlxalq münasibətlərdə dönüş əldə etməklə Azərbaycanın haqlı səsinin eşidilməsinə, xarici dövlətlərlə əlaqələrin möhkəmlənməsinə imkan yarandı. Ulu Öndər azərbaycançılıq ideologiyasını inkişaf etdirməklə, Yeni Azərbaycan Partiyasını formalaşdırmaqla, güclü siyasi təşkilata çevirməklə dünya azərbaycanlılarının, siyasi qüvvələrin birliyinə və səmərəli fəaliyyətinə nail oldu.
Heydər Əliyev xalqın tələbi ilə hakimiyyətə gəlməsəydi əlbəttə ki, bugünkü qüdrətli, qalib Azərbaycandan, hərtərəfli inkişafdan, böyük uğurlardan danışmaq mümkün deyildi. O dövrdə qoyulan təməl bugünkü inkişafımız, xalqımızın birliyi, mübarizliyi üçün bir zəmindir.
- Bu gün Prezident İlham Əliyevin rəhbərliyi ilə qalib və qüdrətli Azərbaycan bənzərsiz nailiyyətlərə imza atır...
- Bu, bir həqiqətdir ki, bütün nailiyyətlərimizin əsası Ulu Öndərimiz Heydər Əliyev tərəfindən qoyulmuşdur. Qürurvericidir ki, bu əsasları Prezidentimiz cənab İlham Əliyev daha da möhkəmləndirir, dahi rəhbərin bəşəri ideyalarını sədaqətlə yerinə yetirir və çox böyük, möhtəşəm qələbələrə nail olur.
Qarabağ torpağının azğın düşməndən xilas edilməsi, 44 günlük müharibə, 23 saatlıq antiterror tədbirləri zamanı ordumuzun qüdrəti, xalqımızın birliyi Heydər Əliyev ideyalarının əbədiyaşarlığını, Liderimiz cənab İlham Əliyevin qətiyyətini və mübarizliyini, xalqına, Vətəninə sevgisini, ehtiramını bütün dünyaya nümayiş etdirdi.
Dünya bir daha duydu və anladı ki, Azərbaycanın iqtisadi-siyasi dayaqları möhkəmdir, ordusu güclü və qüdrətlidir. Bu, Ulu Öndərimiz Heydər Əliyevin vaxtı ilə qoyduğu təməlin, həyata keçirdiyi əməllərin, arzuladığı amalların nəticəsidir, bəhrəsidir.
Bu gün Ulu Öndərimizin ruhu şaddır. Çünki Azərbaycan tam suverendir, müstəqildir, inkişaf yolundadır, dünyada öz yeri, öz sözü olan qüdrətli dövlətdir.
