ABŞ-ın ikinci ən böyük  enerji şirkəti olan  “Chevron”un İdarə Heyətinin sədri Con Vatson  hökumətin tətbiqini  planlaşdırdığı  yeni gömrük vergisi siyasətinin  ölkə iqtisadiyyatının rəqabət qabiliyyətini  azaldacağını bildirib.

“IHS CERAWeek 2017”  enerji konfransında çıxış edən C.Vatson Donald Tramp hökumətinin ABŞ-a müəyyən ölkələrdən idxal olunan mallara gömrük vergisi qoymasının mənfi nəticələrə  gətirib çıxaracağını və ölkənin rəqabət gücünü azaldacağını vurğulayıb. Yeni gömrük vergisinin qüvvəyə minməsindən sonra  ABŞ-ın idxal etdiyi malların qiymətinin artacağına və bunun amerikalı istehlakçılara mənfi təsir edəcəyinə diqqəti çəkən C.Vatson əsl məqsədin sahibkarlığı  daha rəqabətli  etmək olmalı olduğunu qeyd edib.

ABŞ neft sənayesinin qlobal iqtisadiyyatın tədarük zəncirlərinə bağlı olduğunu vurğulayan İdarə Heyətinin sədri yüksək təşkilatlar vergisinin amerikalı neft şirkətlərinin xarici enerji firmaları ilə  rəqabətini çətinləşdirdiyini, lakin enerji sənayesinin artıq 10 ildir  vergi islahatı gözlədiyini bəyan edib.

Qeyd edək ki, seçki kampaniyası vaxtı ABŞ-da təşkilatlar vergisini  35 faizdən 15-20 faizə qədər endirəcəyini   vəd edən Tramp prezident seçiləndən sonra  ölkədəki şirkətlər  diqqəti təşkilatlar vergisinin azaldılacağına  yönəldiblər. Bu cür gözləmə isə  Nyu-York birjasında  indekslərin 10 faizdən çox gəlir gətirməsinə səbəb olub.

D.Tramp, həmçinin  ABŞ-ın Meksikadan idxal etdiyi mallara 35, Çindən idxal etdiyi mallara isə 45 faiz  gömrük vergisi qoymağı planlaşdırdığını bildirmişdi.

Ceyhun Piriyev, “İki sahil”