İraq İran ilə iki ölkənin sərhədində yerləşən neft yataqlarını ortaq istismar etmək  niyyətindədir. 

Bu barədə ötən həftə İraqın neft naziri Cabbar Elleeybi  Bağdadda keçirilən “İraq  Enerjisi  Forumu 2017”-də bildirib. İRNA-nın məlumatına görə, iraqlı nazir qeyd edib ki, rəsmi  Bağdad  neft yataqlarının müştərək istifadəsi məqsədilə  Tehran ilə  danışıqlar aparır.

Neft ixracını sürətləndirmək və enerji mənbələrini şaxələndirməklə  qonşu ölkələrlə əlaqələri inkişaf etdirmənin ölkəsinin əsas siyasəti olduğunu ifadə edən C.Elleeybi, bu istiqamətdə Küveyt ilə də sərhəd problemini həll etmək istədiklərini söyləyib. Qeyd edib ki,  problemin həlli ilə Küveytə təbii qaz ixracı imkanı yaranacaq.

C.Elleeybi bunun  İordaniya, Misir və Avropa ölkələri,  ABŞ ilə əlaqələri stimullaşdıracağını vurğulayıb. 

Nazir gələn il neft  ehtiyatlarına  daha 15 milyard barrel neftin əlavə ediləcəyini və bununla da  İraqın 178 milyard barrel  ilə Səudiyyə  Ərəbistanından  sonra dünyanın  ikinci ən böyük neft  yataqlarına malik ölkə olacağını bəyan edib.

Qeyd edək ki, İranla  Küveyt Fars körfəzində yerləşən “Cənub Pars” yatağını ortaq istismar edirlər. Hər iki ölkə sözügedən yataqdan daha çox yararlanmağa çalışır. Lakin İrana qarşı sanksiyaların tətbiqi bu ölkənin “Cənub Pars” yatağını tam gücü ilə istismar etməsinə maneə yaradırdı.  Sanksiyaların aradan qaldırılmasından sonra isə bu ölkə 24 fazaya malik olan yataqda təbii qazla yanaşı, neft hasilatını da sürətlə artırır. İran rəsmilərinin sözlərinə görə, yaxın zamanlarda bu yataqdakı hasilatın səviyyəsi Küveytlə bərabərləşəcək.

Ceyhun Piriyev, “İki sahil”