Rusiya OPEC və bu təşkilata üzv olmayan ölkələr arasındakı neft istehsalının azaldılması ilə bağlı  razılaşmanın  iyun ayından  sonrakı müddətdə  davam etməyəcəyi təqdirdə hasilatı son  30 ilin ən yüksək həddinə çatdıracaq. Bu barədə məlumat verən Rusiya  Baş nazirinin müavini  Arkadi Dvorkoviç qeyd edib ki,  rus  neft şirkətləri Vyana sazişinin davam etməməsi halında neft  hasilatını azaltmayacaqlar. 

Rusiyanın  energetika  naziri Aleksandr Novak ötən ay açıqlamalarının birində  2017-ci ildə hasilatın  548-551 milyon tona  yüksələ biləcəyini,  bunun da 1987-ci ildən indiyədək ən yüksək səviyyə olan gündəlik 11.01-11.07 milyon barrelə  bərabər olacağını bildirmişdi.

Rusiyalı nazir, həmçinin bu günlərdə neft hasilatının azaldılması ilə bağlı 30 noyabr 2016-cı il Vyana anlaşmasının uzadılması qərarını OPEC-in may ayında keçirəcəyi iclasda verəcəyini bildirib. A. Novakın sözlərinə görə, may iclasına qədər OPEC-in qlobal neft ehtiyatlarının həcmi və neft bazarının texniki təhlili ilə bağlı məruzəsini gözləmək lazımdır.

Qeyd edək ki, Vyana razılaşmasına görə, Rusiya gündəlik hasilatı 300 min barrel azaltmaq öhdəliyini götürüb və aprel ayının 21-nə bunu 83 faiz  və ya 250 min barel yerinə yetirib. A.Novak bu ayın sonuna qədər öhdəliyə tam əməl ediləcəyini bildirib.

Xatırladaq ki, OPEC, Rusiya və digər  üzv olmayan bəzi neft ixrac edən ölkələr  2017-ci ilin ilk yarısına kimi  hasilatı gündəlik  1.8 milyon barrel  azaltmaqla bağlı  razılaşma imzalayıblar. Bu ölkələr arasında gündəlik hasilatı 35 min barrel azaltmaqla bağlı öhdəliyi olan Azərbaycan da var.    

Ceyhun Piriyev, “İki sahil”