Oktyabrın 7-11-də Almaniyanın Köln şəhərində keçirilmiş "ANUGA" Beynəlxalq Ərzaq Sərgisində Azərbaycan məhsullarının ixracına dair bir neçə müqavilə imzalanıb.
AZƏRTAC xəbər verir ki, bu barədə Azərbaycanda İxracın və İnvestisiyaların Təşviqi Fondunun (AZPROMO) rəhbəri Rüfət Məmmədov oktyabrın 13-də sərginin yekunlarına həsr olunmuş mətbuat konfransında deyib.
Mətbuat konfransında diqqətə çatdırılıb ki, sərginin keçirildiyi 5 gün ərzində Azərbaycanın “Made in Azerbaijan” vahid ölkə stendi və burada təqdim edilən 20-dən çox yerli şirkətimizin məhsulları sərgi ziyarətçiləri və xarici şirkətlər tərəfindən maraqla qarşılanıb. Belə ki, xarici ölkələrdə keçirilən digər sərgilərdə olduğu kimi, “ANUGA” sərgisində də Azərbaycanın bir sıra məhsulları, xüsusilə nar və nar şirəsi ziyarətçilərin və şirkətlərin diqqət mərkəzində olub. Azərbaycanın “Azqranata” şirkəti İsrailə 20 ton nar şirəsi ixracına dair müqavilə imzalayıb, Qətərə “ more” markası ilə müxtəlif meyvə şirələrinin ixracına dair ilkin razılıqlar əldə edib. “Mars FK” şirkəti İsveçrə və Monqolustanın satış şirkətləri ilə apardığı danışıqların nəticəsində bu ölkələrə ilkin olaraq 100 ton və 18 ton nar ixracına dair sifarişlər alıb, “Aqro-Azerinvest” MMC isə Almaniyaya “Goldenes Baku” markalı nar şərabının ixracına dair razılıq əldə edib. Bundan başqa, “Sirab” şirkəti Səudiyyə Ərəbistanına mineral suların ixracına dair danışıqlara başlayıb.
Xüsusi emal üsulu ilə qurudulmuş xurma istehsal edən “Bal Xurma” şirkəti Argentina, Niderland, İtaliya və Yunanıstanda otellərin qida təchizatı ilə məşğul olan bir sıra şirkətlərlə danışıqlar aparıb və ixraca dair ilkin razılıqlar əldə edib. Azərbaycanın qənnadı məmulatları istehsalçısı olan “Konfiron” MMC isə sərgi çərçivəsində Rumıniyaya ixraca dair danışıqlar aparıb.
Azərbaycanın fındıq istehsalçıları da sərgi çərçivəsində bir sıra müqavilələr imzalayıblar. Belə ki, Azərbaycanın fındıq istehsalçısı “Azərstar” Hollandiya və Danimarkanın satışla və qənnadı məmulatlarının istehsalı ilə məşğul olan şirkətləri ilə iki müqavilə imzalayıb. Müqavilələrə əsasən, “Azərstar” şirkəti oktyabr və dekabr aylarında bu ölkələrin hər birinə ilkin mərhələdə 22 ton fındıq ixrac edəcək. “Azərstar” həmçinin, İsveçrəyə 22 ton fındıq ixracına dair danışıqlar aparıb.
Rüfət Məmmədov qeyri-neft sektorunun inkişafı istiqamətində həyata keçirilən islahatlar, iqtisadiyyatın diversifikasiyası, özəl sektorun gücləndirilməsi, rəqabətədavamlı qeyri-neft məhsullarının istehsalı, ixracatçılara yaradılmış əlverişli şərait, ixracın genişləndirilməsi, xarici ölkələrə təşkil edilən ixrac missiyaları, "Made in Azerbaijan" brendinin xarici ölkələrdə tanıdılması və xarici investisiyaların təşviqi istiqamətində görülən işlər barədə məlumat verib. "Ötən il 3, bu il ərzində 6 ixrac missiyası həyata keçirilib. İxrac missiyaları Çin, Birləşmiş Ərəb Əmirlikləri, Almaniya, Qətər, Pakistan, Əfqanıstan, Qazaxıstan və digər dövlətlərə təşkil olunub. Bu günədək ixrac missiyaları çərçivəsində 30-a yaxın müqavilə imzalanıb, bir neçə müqavilənin imzalanması istiqamətində işlər aparılır", - deyə R.Məmmədov qeyd edib.
AZPROMO-nun vitse-prezidenti Yusif Abdullayev bildirib ki, sərgidə "Made in Azerbaijan" brendinin təbliği məqsədilə bir sıra promo materiallardan istifadə edilib. Sərginin girişlərində "Made in Azerbaijan"a dair reklam bannerləri yerləşdirilib, ziyarətçilər üçün bələdçi və kataloqlarda "Made in Azerbaijan" reklam olunub. Bundan başqa, sərgidə Azərbaycanın tarixini və mədəniyyətini özündə əks etdirən videoçarxlar nümayiş olunub.
Mətbuat konfransında sərgidə iştirak etmiş şirkətlərin nümayəndələri imzalanan sazişlər, əldə olanan razılaşmalar barədə məlumat verib, sahibkarlığın inkişafına, ixracatçılara göstərilən böyük diqqət və qayğıya, dəstək tədbirlərinə görə dövlət başçısına minnətdarlıqlarını bildiriblər.
