Şanxay Əməkdaşlıq Təşkilatının Səmərqənd Sammitində Azərbaycan Prezidentinin lakonik çıxışı həm Sammitin özündə, həm də beynəlxalq media sistemində çox böyük və müsbət rezonans doğurdu.Bunun əsas səbəbi isə Prezidentin çıxışında Azərbaycanın müasir inkişaf strategiyasının yol xəritəsinin təqdimatı ilə bağlı oldu. Bu inkişaf strategiyasının əsas göstəricilərindən biri və bəlkə də başlıcası Azərbaycanın tranzit və nəqliyyat-logistika imkanları ilə bağlıdır. Məhz ona görə də Prezident İlham Əliyev Rusiya,Çin, Pakistan,Hindistan kimi güc dövlətləri və daha iyirmiyə yaxın ölkə liderlərinin iştirak etdiyi bu mötəbər Sammitdəki çıxışına belə bir tezislə başladı:”Mən həmkarlarıma Azərbaycanın tranzit və nəqliyyat-logistika imkanları barədə məlumat vermək istərdim”. Çox maraqlı görünə bilər ki,Prezident niyə məhz bu məsələ üzərində birbaşa dayandı. Çünki tranzit və nəqliyyat-logistika təkcə ölkədaxili inkişafın əsas göstəricisi deyil,həm də Azərbaycanı bir çox tellərlə Şərqə,Qərbə,Cənuba və Şimala bağlayır.Habelə,Prezidentin xüsusu qeyd etdiyi kimi,”Azərbaycan Şərq-Qərb və Şimal-Cənub nəqliyyat dəhlizləri kimi regional kommunikasiya layihələrinin işə düşməsinə sanballı töhfələr verib.” Bir də qeyd edək ki,bu töhfələr sırasında Çini və bütövlükdə Asiya ölkələrini Avropaya birləşdirən qədim “İpək Yolu”nun yenidən dirçəlməsində Azərbaycan çox mühüm rol oynadı.Bundan əlavə digər bir çox regional layihələr Azərbaycanın iqtisadi,mənəvi xeyir-duası ilə gerçəkləşdi.
Azərbaycan Prezidenti öz çıxışında Bakı Beynəlxalq Dəniz Ticarət Limanının gücünü göstərən rəqəmləri açıqladı: ” Bu liman indi ildə 15 milyon ton yükdaşıma qabiliyyətinə malikdirsə, yaxın gələcəkdə bu rəqəm 25 milyon tona qədər çatdırıla bilər.”
Prezident bildirdi ki, Azərbaycan 52 gəmi ilə Xəzər dənizində ən böyük mülki yük donanmasına malikdir və əlavə etdi ki, bu gəmilər Bakı Gəmiqayırma Zavodunda istehsal olunur. Aydındır ki,nəqliyyat-logistika sistemində yol infrastrukturu çox böyük əhəmiyyətə malikdir.Azərbaycan Prezidenti ölkəmizin bu sahədəki uğurlarını Sammit iştirakçılarının diqqətinə bu rəqəmlərlə çatdırdı:” Son 20 ildə Azərbaycanda 19 min kilometr avtomobil yolu ,1400 kilometr dəmiryolu tikilib və ya təmir edilib. Bu gün Azərbaycan işğaldan azad edilmiş ərazilərdə minlərlə kilometr avtomobil yolu və yüzlərlə kilometr dəmir yolu çəkir.” Azərbaycan Prezidenti çox böyük qürurla ölkəmizin “18 təyyarə ilə regionda ən böyük mülki hava yük donanmalarından birinə malik olduğu“nu dilə gətirdi.
Bu gün dünyanın bütün yerlərində yaxşı görürlər ki, Azərbaycanda 7 beynəlxalq hava limanı var və Prezident informasiya verir ki,2025-ci ilə qədər ölkəmizdə daha 2 beynəlxalq hava limanı istifadəyə veriləcək.
Azərbaycan Prezidenti nəqliyyat-logistika xəttinin gələcəkdə daha sürətlə inkişaf etdiriləcəyini Qarabağ münaqişəsinin bitməyi ilə birbaşa əlaqələndirdi. Prezidentin sözləridir: ”Zəngəzur dəhlizi açıldıqdan sonra bu, region ölkələrinin nəqliyyat imkanlarını daha da artıracaq və marşrut boyu yerləşən bütün ölkələr üçün faydalı olacaqdır.”
Prezident belə bir ciddi problemi də diqqətə çatdırdı ki, bu il sentyabrın 13-də Ermənistanın Azərbaycana qarşı sərhəd təxribatları inkişafa çox ciddi əngəllər yaradır. Prezident qeyd etdi ki,”Ermənistanın bu təxribatı iki ölkə arasında normallaşdırma prosesinə böyük zərbədir. Buna görə bütün məsuliyyət Ermənistanın hərbi-siyasi rəhbərliyinin üzərinə düşür.”
Prezident öz çıxışında bəzi beynəlxalq təşkilatların Azərbaycana qarşı ikili standartlarla çıxışlarını tənqid etdi və bütün bunların qarşısında Azərbaycanın gücünü,bacarığını faktlarla dilə gətirdi.
Yuxarıda da qeyd etdiyimiz kimi, Azərbaycan Prezidentinin bu mötəbər Sammitdəki çıxışındakı tezislər bir sıra ölkələrin media sistemində rəğbətlə qarşılandı. Bu çıxış Azərbaycanın müasir dünya məkanında tutduğu yeri göstərdi,xüsusilə bir sıra dövlətləri birləşdirən nəqliyyat-logistika probleminin Azərbaycanda necə həll edildiyini dəqiq faktlarla sübuta yetirdi.
Şəlalə Rəhimova,
Heydər Əliyev adına liseyin tarix müəllimi
