BSU-da Zəfər Gününə həsr olunmuş tədbir keçirildi
Noyabrın 4-də Bakı Slavyan Universitetində Müzəffər Ali Baş Komandan İlham Əliyevin rəhbərliyi ilə qazanılan Qələbənin ikinci ildönümünə həsr olunmuş tədbir keçirildi.
Tədbir Azərbaycan Respublikasının Dövlət Himninin səsləndirilməsi və müasir müstəqil Azərbaycan dövlətinin qurucusu, ulu öndər Heydər Əliyevin və müstəqilliyimizin, ərazi bütövlüyümüzün təmin olunması yolunda canlarından keçən Vətən oğullarının əziz xatirəsinin bir dəqiqəlik sükutla yad edilməsi ilə başlandı.
Daha sonra Zəfərlə başa çatan 44 günlük Vətən müharibəsi ilə bağlı videoçarx nümayiş edildi.
Tədbiri giriş sözü ilə açan Bakı Slavyan Universitetinin rektoru Anar Nağıyev Zəfər Günü münasibətilə iştirakçıları təbrik edərək dedi: “İkinci ildönümünü qeyd etdiyimiz Zəfər Günü çoxəsrlik tariximizin şanlı səhifəsi, xalqımızın qürur mənbəyi və Azərbaycan dövlətinin qüdrətinin ifadəsidir. 44 günlük Vətən müharibəsində Azərbaycan Prezident İlham Əliyevin rəhbərliyi ilə bütün cəbhələrdə - hərb meydanında, beynəlxalq informasiya platformasında və diplomatiya müstəvisində möhtəşəm qələbə qazanaraq tarixi ədalətin, ərazi bütövlüyümüzün və beynəlxalq hüququn bərpasına müvəffəq oldu. Dövlət başçısının müvafiq Sərəncamı ilə Zəfər Gününün təsis edilməsi ən yeni tariximizin parlaq səhifəsi olan Zəfər salnaməsinin gələcək nəsillərə ötürülməsi baxımından olduqca mühüm əhəmiyyətə malikdir. Vətən müharibəsindən ötən iki ildə Azərbaycan tərəfindən atılan addımlar tarixi Qələbəmizin nəticələrinin iqtisadi, siyasi və diplomatik müstəvidə möhkəmləndirilməsini təmin edir. Bu gün işğaldan azad edilmiş ərazilərdə ardıcıl və sistemli abadlıq-quruculuq işləri aparılır. Şübhəsiz ki, müasir bərpa-quruculuq konsepsiyaları əsasında reallaşdırılan tədbirlər Qarabağ və Şərqi Zəngəzur iqtisadi rayonlarının yenidən qurulmasına səbəb olacaq.”
Anar Nağıyev vurğuladı ki, bu sevinci bizə yaşadan dövlət başçısı, Müzəffər Ali Baş Komandan İlham Əliyevə, rəşadətli Azərbaycan Ordusuna minnətdarıq: «Canları, qanları ilə tarix yazaraq şəhidlik zirvəsinə ucalan Vətən oğullarının ruhu qarşısında baş əyir, qazilərimizə Allahdan şəfa diləyirik. Onlar Vətən müharibəsində qazandığımız tarixi Zəfərimizin qəhrəmanlarıdırlar. Qalib ölkənin vətəndaşı olmaq böyük qürur və məsuliyyətdir.»
Daha sonra Milli Məclisin deputatı Arzu Nağıyev "Azərbaycanın təcavüzkar üzərində Qələbəsinə səbəb olan siyasi addımlar və əsas istiqamətlər" mövzusunda çıxış edərək tarixi Zəfərlə dövlətimizin yeni reallıqlar yaratdığını diqqətə çatdırdı.
Universitetin Diplomatiya və xarici siyasət kafedrasının müdiri, dosent Əsgər Əhməd çıxışında vurğuladı ki, xalqımız və rəşadətli ordumuz 44 gündə şanlı tarix yazaraq 30 illik işğala son qoydu, ərazi bütövlüyümüz bərpa olundu. Müzəffər Ali Baş Komandan, Prezident İlham Əliyev Azərbaycanı qalib ölkəyə, Azərbaycan xalqını qalib xalqa çevirdi.
Milli Məclisin deputatı Elman Nəsirov bildirdi ki, şəhidlərimizin, qazilərimizin qəhrəmanlığı dövlətimiz və xalqımız tərəfindən yüksək qiymətləndirilir. Döyüşlərdə iştirak etmiş on minlərlə hərbçi Prezident İlham Əliyevin imzaladığı sərəncamlarla orden, medal və fəxri adlarla təltif olundu. Qəhrəmancasına şəhadətə ucalan igidlərimiz isə indi təkcə ailəsinin deyil, bütün xalqımızın qürur mənbəyidir.
Bakı Slavyan Universitetinin jurnalistika kafedrasının müdiri, siyasi elmlər doktoru Vüqar Rəhimzadə çıxışında diqqətə çatdırdı ki, bu gün hər birimiz müasir Azərbaycan tarixinin ən qürurlu günlərini yaşayırıq: “Böyük fəxarət hissi ilə qeyd etdiyimiz Qələbə Azərbaycan xalqının əzmi və iradəsi, ölkəmizin iqtisadi gücü, müasir ordu quruculuğu, xalq-iqtidar birliyi, müharibənin başlandığı ilk günlərdən etibarən xalqımızın bir yumruq kimi ölkə Prezidentinin ətrafında birləşməsi və dövlətimizin başçısı, Müzəffər Ali Baş Komandan İlham Əliyevin illərlə yeritdiyi uğurlu daxili və xarici siyasətin məntiqi nəticəsidir.”
Vüqar Rəhimzadə vurğuladı ki, Vətən uğrunda canını fəda etməkdən müqəddəs heç nə ola bilməz: “Şəhidlərimizin Vətən uğrunda göstərdikləri fədakarlıqları, torpaq sevgisi, döyüş yolu hər birimiz, xüsusilə də gənclərimiz üçün bir örnəkdir. Şəhidlərimizə hörmət və ehtiram hər birimizin vətəndaşlıq borcu, həyat amalı olmalıdır. Hər bir Azərbaycan vətəndaşı bundan sonra da bu ideyaları, irsi qorumalı, onlara sadiq qalmalı, gələcək nəsillərimiz bu ideya və prinsiplərlə böyüməlidirlər. Şəhidlərimizin və qazilərimizin valideynləri qürur hissi keçirməlidirlər ki, onlar Vətənini, dövlətini, xalqını sevmək nümunəsi ortaya qoyan, qəhrəmanlıqlarından əsrlərboyu danışılacaq, filmlər çəkiləcək, kitablar yazılacaq belə mərd və qorxmaz Vətən oğulları böyüdüblər. Vətən sevgisini, xalqa məhəbbəti, yurda bağlılığı özündə ehtiva edən bu cür cəsur oğullar böyüdən valideynlərin hər birinin qarşısında baş əyirəm. Allahdan şəhidlərimizə rəhmət diləyirəm. Qazilərimizə cansağlığı arzu edirəm. Bu möhtəşəm Qələbə günü – Zəfər bayramı münasibəti ilə xalqımızı təbrik edirəm."
Milli Məclisin deputatı Vüqar Bayramov diqqətə çatdırdı ki, 44 gün davam edən və işğal altındakı ərazilərimizin azad edilməsi ilə nəticələnən Vətən müharibəsi tariximizin ən parlaq səhifəsi, Azərbaycan xalqının iftixar və qürur mənbəyidir.
Daha sonra şəhidlərimizə həsr olunmuş videoçarx nümayiş edildi.
Tədbirdə iştirak edən şəhid valideynləri övladlarının şərəfli döyüş yolundan danışdılar. Onlar, həmçinin dövlət səviyyəsində göstərilən diqqət və qayğıya görə Prezident İlham Əliyevə və Birinci vitse-prezident Mehriban xanım Əliyevaya minnətdarlıqlarını bildirdilər.
Çıxış edən “N” saylı hərbi hissənin zabiti, leytenant Pərvin Əzimov Vətən müharibəsi ilə bağlı xatirələrini bölüşdü və döyüş yoldaşlarının göstərdikləri igidliklərdən söhbət açdı.
Xalq artisti Nurəddin Mehdixanlı tədbirdə çıxış edərək bildirdi ki, 44 gün davam edən haqq mübarizəsi sayəsində bütün dünya gördü ki, Azərbaycan xalqı bir yumruq kimi özünün Ali Baş Komandanının ətrafında birləşib.
Tədbir Bakı Slavyan Universitetinin Məktəb-lisey kompleksi şagirdlərinin xor kollektivinin ifasında " Yaşa Azərbaycan!" adlı Qələbə mahnısı ilə yekunlaşdı.
Yaqut Ağaşahqızı, «İki sahil»
