Növbədənkənar parlament seçkiləri ilə bağlı maarifləndirmə keçirilməlidir.

“İki sahil” xəbər verir ki, bunu Mərkəzi Seçki Komissiyasının sədri Məzahir Pənahov MSK-nın bu gün keçirilən iclasında deyib.

"Bu parlament seçkiləri Azərbaycanın bütün suveren ərazilərində keçirilən ilk parlament seçkiləri olacaq. İşğaldan azad edilmiş ərazilərdə seçki məntəqələrinin sayı artacaq. Bu, təbiidir. Hazırda məskunlşama sürətlə davam edir, insanlar öz torpaqlarına qayıdır. Bu seçkilərdə biz onları məmnuniyyətlə nəzərə alacağıq. Bu baxımdan Milli Məclisə seçkilər də çox böyük tarixi əhəmiyyət kəsb edəcək", - o qeyd edib.

Qeyd edək ki, Prezident İlham Əliyev altıncı çağırış Azərbaycan Respublikası Milli Məclisinin buraxılması və Azərbaycan Respublikasının Milli Məclisinə növbədənkənar seçkilərin təyin edilməsi haqqında sərəncam imzalayıb.

Azərbaycan Respublikasının Milli Məclisinə növbədənkənar seçkilər 2024-cü il sentyabrın 1-nə təyin edilib.