Bu gün Vətəndaşlara Xidmət və Sosial İnnovasiyalar üzrə Dövlət Agentliyi - “ASAN xidmət” və BP ASAN tərəfindən yaradılmış potensialın inkişafı üzrə təlim proqramını uğurla başa vurmuş 50-dən çox könüllüyə “ASAN Akademiyası” sertifikatlarını təqdim edib.

“İki sahil” “BP-Azerbaijan” şirkətinə istinadla xəbər verir ki, hazırda davam edən bu layihə çərçivəsində əlavə olaraq 30-dan çox gənc sonda müxtəlif sahələr üzrə beynəlxalq sertifikatlar alacaq.

Proqram layihələrin idarə edilməsi, maliyyə/mühasibatlıq, dil, informasiya texnologiyaları və bir sıra "yumşaq" və texniki bacarıqlar sahəsində bilikləri inkişaf etdirmək məqsədi daşıyır. Təlim proqramı IELTS, ITIL 4, PMP, SHRM, ACCA, Rəqəmsal Liderlik və İdarəetmə, Öyrətmək, ACA/Adobe Certificated, ACE (Adobe Certificated), UX, DMI mütəxəssisi, PMS (peşəkar mühasib), Udemy kursları, Pr Scrum Master 1, Pr Scrum Pr owner, Pr Agile Leadership, Kanbanla Pr Scrum və Coursera kursları kimi 18 tematik sahəni əhatə edir.

Paralel olaraq, bu proqram iştirakçıların karyera yüksəlişi və peşəkar inkişaf səylərinə dəstək məqsədilə praktiki səriştələri də inkişaf etdirmək imkanı yaradır.

BP-nin Xəzər regionu üzrə vitse-prezidenti Bəxtiyar Aslanbəyli deyib: “BP bu çox mühüm potensialın yaradılması təşəbbüsündə iştirak etməkdən məmnundur. İnanırıq ki, ASAN vasitəsilə Azərbaycan vətəndaşlarına göstərilən mükəmməl xidmətlərin dəstəklənməsində bu təşəbbüs davamlı miras qoyacaq. Bu gün könüllü sertifikatı alan gənclər 39 minlik ASAN könüllüsü ordusuna qoşulmaqları ilə fəxr edə bilərlər, çünki onlar da ölkənin örnək olduğu bir sahəyə - vətəndaşlara xidmət sahəsinə öz töhfələrini verəcəklər. "Məlumdur ki, ASAN-ın Azərbaycan vətəndaşlarına göstərdiyi innovativ xidmətlərin uğuru bütün gözləntiləri ötüb. Öz səylərini bütün ASAN ailəsinin səyləri ilə birləşdirərək bu uğura öz töhfələrini verən könüllülərə “əhsən” deyirik.”

Müddəti bir il olan bu layihənin dəyəri 56 min manatdan (33 min ABŞ dolları) artıqdır.

Layihə "ASAN Könüllüləri" Gənclər Təşkilatı ictimai birliyi tərəfindən həyata keçirilir.