ABŞ-nin yeni seçilmiş prezidenti Donald Tramp Ağ Evə gələrək hazırki prezident Cozef Baydenlə görüşüb.

“İki sahil” xəbər verir ki, bu barədə "Reuters" məlumat yayıb.

İlkin məlumata görə, onlar hakimiyyətin dinc yolla ötürülməsinin zəruriliyi barədə razılığa gəliblər.

***

ABŞ Prezidenti Cozef Bayden çərşənbə günü Ağ Evdəki Oval kabinetdə yeni seçilmiş prezident Donald Trampla görüşəcək.

“İki sahil” xəbər verir ki, bu barədə Ağ Evin nümayəndəsi Karin Jan-Pyer bildirib.

Onun sözlərinə görə, görüş Şərq vaxtı ilə saat 11:00-da (Bakı vaxtı ilə saat 20:00) başlayacaq.

Amerika mətbuatı qeyd edib ki, vəzifədən gedən və gələn ABŞ liderləri arasında bu cür görüşlər ənənədir və hakimiyyətin bir prezidentdən digərinə sülh yolu ilə ötürülməsinin başlanğıcını qeyd etmək məqsədi daşıyır.

Lakin 2020-ci ildə seçkidə uduzan Tramp məğlubiyyətini etiraf etməyib və bu adətə məhəl qoymayıb. O, həmçinin Baydenin 2021-ci ildə andiçmə mərasimində iştirak etməyib.

ABŞ-də prezident seçkiləri noyabrın 5-də keçirilib. Respublikaçı Donald Tramp Demokratlar Partiyasının namizədi Kamala Harris üzərində inamlı qələbə qazanıb. Trampın andiçmə mərasimi 2025-ci il yanvarın 20-nə planlaşdırılıb.