Türkiyənin “NOW” kanalında yayımlanan “Şakir Paşa Ailəsi: Möcüzələr və Qalmaqallar” serialının ilk bölümü müzakirələri də özü ilə gətirib. Məşhur yazıçı və “Halikarnas Balıqçısı” Cevat Şakir Kabaağaçlının nəvələri açıqlama verərək, serialda danışılan hekayənin ailə ilə məsləhətləşmədən yazıldığını bildirib.

“İki sahil”in “Haber Global”a istinadən verdiyi məlumatına görə, Kabaağaçlı ailəsinin yaydığı açıqlamada serialın prodüserlərinin onlardan heç vaxt icazə almadıqlarını vurğulayıb. Ailə bu vəziyyətin onların qanuni hüquqlarını pozduğunu bildirib və qanuni işlərə başlanıldığını açıqlayıb.

"Babamız Cevat Şakir Kabaağaçlının həyat və yaradıcılığından bəhs edən serialın çəkilişi zamanı nə bizimlə, nə də digər ailə üzvlərimizlə heç bir əlaqə saxlanılmayıb. Bu səbəbdən də vəziyyət ailəmizi dərindən üzdü və qanuni hüquqlarımızı qorumaq üçün hüquqi proses başladıldı”, - deyə açıqlamada qeyd edilib.

Məhərrəm Ağalaroğlu, “İki sahil”