ABŞ-ın Kaliforniya ştatında kiçik təyyarə mebel fabrikinin damına çırpılıb.

“İki sahil” xəbər verir ki, hadisə nəticəsində 2 nəfər ölüb, 19 nəfər yaralanıb.

Hava trafikini izləyən “FlightAware”in məlumatına görə, təyyarə Orinc qraflığında hava limanından qalxdıqdan iki dəqiqə sonra yaxınlıqdakı mebel fabrikinin damına çırpılıb.

Xəsarət alan 8 nəfərə hadisə yerində tibbi yardım göstərilib, 11 nəfər isə xəstəxanaya çatdırılıb.

Hava limanı əməliyyatlarında çalışan Chris Villalobos, pilotun havaya qalxdıqdan sonra təcili eniş üçün geri dönəcəyini hava hərəkətini idarəetmə qülləsinə bildirdiyini, lakin təyyarə ilə bağlı problemin mənbəyinin aydın olmadığını söyləyib.

Villalobos, təyyarə sahibinin tez-tez hava limanından istifadə etdiyini söyləyib.

Fullerton Polis Departamenti açıqlamasında bildirib ki, qəzada həyatını itirənlərin şəxsiyyəti yaxın qohumları ilə əlaqə saxlanıldıqdan sonra müəyyən ediləcək.

Məhərrəm Ağalaroğlu, “İki sahil”