Fevralın 15-də Efiopiyanın paytaxtı Əddis-Əbəbədə Afrika İttifaqı dövlət və hökumət başçılarının 38-ci sammiti işə başlayacaq.
“İki sahil” Əlcəzair mətbuatına istinadla xəbər verir ki, Afrika İttifaqı sammiti çərçivəsində Sülh və Təhlükəsizlik Şurasının fəaliyyəti, Afrika İttifaqının institusional islahatları və Afrika azad ticarət zonası layihəsinin icrası ilə bağlı hesabat müzakirə olunacaq. Afrikalılara kompensasiya ödənilməsi məsələsi də sammitin gündəliyindədir. Bu, tarixi ədalətin təmin edilməsi və afrikalıların razı salınması istiqamətində atılan konkret addım kimi qiymətləndirilir.
Qeyd etmək lazımdır ki, “Afrikalılar və Afrika mənşəli şəxslər üçün kompensasiya yolu ilə ədalət” məsələsi dövlət və hökumət başçıları tərəfindən 2023-cü ilin fevralında Əddis-Əbəbədə keçirilən 37-ci illik sessiyada müəyyən olunub. Bu təşəbbüs afrikalı və diaspor icmalarını birləşdirərək, ədalət və kompensasiya məsələləri üzrə vahid cəbhə yaratmağa xidmət edir. Bu, xüsusilə, kolonializm, irqi ayrı-seçkilik və soyqırımı da daxil olmaqla, afrikalılara və Afrika mənşəli insanlara qarşı törədilmiş tarixi cinayətlərə görə kompensasiyanın təmin edilməsinə yönəlib.
Bu gün keçirilən görüşdə dövlət başçıları Somali, Cənubi Sudan, Sahel bölgəsi və Böyük Göllər regionunda davam edən münaqişələri, habelə Kamerun, Efiopiya, Sudan və Konqo Demokratik Respublikasındakı yeni böhranları müzakirə edəcəklər.
Afrika liderləri, həmçinin qitənin maliyyə suverenliyini gücləndirmək və beynəlxalq kredit reytinq agentliklərinin yaratdığı uzunmüddətli problemlərlə mübarizə aparmaq üçün Afrika Kredit Reytinq Agentliyinin təsis olunmasını da nəzərdən keçirəcəklər.
Sammitdə Afrika İttifaqı Komissiyasının sədri vəzifəsinə seçki keçiriləcək. Bu vəzifəyə Şərqi Afrikanı təmsil edəcək üç namizəd irəli sürülüb - Keniya Respublikasının sabiq Baş naziri Rayla Odinga, Cibutinin xarici işlər naziri Mahmud Əli Yusuf və Madaqaskarın sabiq xarici işlər naziri Riçar Randriamandrato. Hazırda Komissiyanın sədri Çad nümayəndəsi Musa Fəqi Məhəmməddir.
