Almaniyanın Aşağı Saksoniya federal əyalətinin Edevext qəsəbəsində fosfor qumbarasından zəhərli qaz sızması 9 nəfərin zəhərlənməsi ilə nəticələnib.

“İki sahil” “Spiegel” qəzetinə istinadla xəbər verir ki, xəsarət alan doqquz nəfər xəstəxanaya yerləşdirilib. Onların üçü uşaqdır.

Qəsəbədə yoldan keçənlər çəmənlikdə tüstü gördükdən sonra yanğınsöndürənlərə məlumat veriblər. Hadisə yerinə gələn xilasedicilər əvvəlcə tüstünün yanğından qaynaqlandığını düşünsələr də, sonradan onun fosfor qumbarasından çıxdığını müəyyən ediblər və dərhal polisi məlumatlandırıblar.

Yanğınsöndürmə xidməti ağ fosforun yüksək dərəcədə zəhərli olması ilə bağlı xəbərdarlıq edib. Fosfor qumbarasının haradan gətirildiyi və niyə tüstülənməyə başladığı araşdırılır.