Hayastan oyun qaydalarına ləyaqətlə riyaət edərək rəsmi Bakının legitim şərtlərini qəbul etməlidir

İkinci Qarabağ müharibəsindəki tarixi Zəfəri ilə yeni reallıqlar yaradan, Cənubi Qafqazda etimad mühiti və dayanıqlı sülhün bərəqərar olması üçün ciddi addımlar atan Azərbaycan daim regionda sülh təşəbbüslərinin müəllifi olub. Ölkəmizin başçısının bildirdiyi kimi, tarixi Qələbəmiz sülh danışıqlarına yol açıb. Ən əsası da odur ki, bu gün Azərbaycanın və Ermənistanın sülhün əldə edilməsində mövqeləri bir-birinə kifayət qədər yaxınlaşıb.

Bütün bunların fonunda demək olar ki, bəzi amillər hələ də Ermənistanla Azərbaycan arasında sülhün əldə edilməsinə ciddi maneə yaradır. Bir tərəfdən Bakı ilə sülh sazişini imzalamağa, regional əməkdaşlığa hazır olduğunu bildirən Ermənistan hakimiyyəti əməldə buna süni əngəllər törədir. Rəsmi İrəvanın bunu havadarlarının diktəsi və təzyiqi ilə etməsi şübhə doğurmur. Nikol Paşinyanın sülhdən qorxmasının, konstruktiv mövqe nümayiş etdirməkdən çəkinməsinin əsas səbəbi məhz bu amildir.

Ermənistan bəzi Qərb ölkələrinin təlimat, təzyiq və şirnikləndirmələri ilə danışıqlar prosesini əngəlləyir, gecikdirmə taktikasına əl atır. Azərbaycan tərəfinin mövqeyi belədir ki, torpaqlarımızın işğalda olduğu zamanlar qəbul edilmiş Ermənistan konstitusiyasında dəyişiklik edilməsi regional geosiyası zərurətdir. Rəsmi İrəvan nəhayət anlamalıdır ki, iki ölkə arasında sülh müqaviləsinin imzalanmasına münbit zəminin yaradılması konstitusiyadakı dəyişikliklərdən, eləcə də ATƏT-in Minsk qrupunun ləğvinə razılıq verilməsindən keçir. Ermənistan tərəfi Müstəqillik Aktına və bu akta istinad olunan Konstitusiyanın preambula hissəsinə müvafiq qaydada dəyişiklik etməlidir. Çünki işğalçı dövlətin müstəqillik haqqında Bəyannaməsində Azərbaycanın Qarabağ bölgəsinin Ermənistana birləşdirilməsinə, ölkəmizin ərazi bütövlüyünün pozulmasına birbaşa çağırışlar var. Ən əsası da odur ki, Ermənistan konstitusiyasında bu sənədə istinadlar öz əksini tapıb.

Ekspertlərin də bildirdikləri kimi, heç bir ölkə başqa suveren dövlətin ərazisinə iddia irəli sürə bilməz. Eləcə də bu iddia heç bir halda həmin dövlətin ali qanunu hesab olunan konstitusiyasında əks oluna bilməz. Deməli, Ermənistanla əldə oluna biləcək davamlı sülhün başlıca şərti məhz bu tələbin yerinə yetirilməsidir. Digər tərəfdən, bugünkü reallıqlar fonunda ATƏT-in Minsk qrupunun formal olsa belə mövcudluğuna heç bir ehtiyac yoxdur. Prezident İlham Əliyev ölkəmizdə səfərdə olan Almaniya Prezidenti Frank-Valter Ştaynmayer ilə mətbuata bəyanatında bu məsələləri nəzərə çatdıraraq Azərbaycanın qətiyyətli mövqeyini bir daha ifadə etdi.

Ölkəmizin başçısı almaniyalı həmkarı ilə mətbuata bəyanatında bildirdi ki, bu günə qədər sülh müqaviləsinin mətni tam razılaşdırılıb, 17 paraqrafdan ibarətdir. Azərbaycan burada hər hansı bir əlavə şərt irəli sürmür: “Bizim şərtlərimiz Ermənistan üçün bəllidir, yenilik deyil. Bu şərtləri biz uzun müddət ərzində irəli sürürük. Ancaq Ermənistandan bu günə qədər hər hansı bir ciddi cavab almamışıq. Nədən ibarətdir bu? Birinci, ATƏT-in Minsk qrupu ləğv edilməlidir”.

Dövlətimizin başçısı vurğuladı ki, ikinci məsələ Ermənistanın konstitusiyası ilə bağlıdır: “Ermənistan konstitusiyasında Ermənistan müstəqillik aktına istinad var. O konstitusiyanın tərkib hissəsidir. Orada isə Azərbaycanın hüquqi, tarixi ərazisi Ermənistanla birləşməsi haqqında müddəa var və bu, bizə qarşı açıq ərazi iddiası sayılır. Ona görə Ermənistan konstitusiyasından bu bəndin çıxarılması bizim legitim tələbimizdir. Bu iki şərt təmin olunandan sonra sülh müqaviləsini imzalanmaq üçün heç bir maneə olmayacaq. Necə deyərlər, top Ermənistanın tərəfindədir. Əgər Ermənistan doğurdan da sülh müqaviləsini imzalamaq istəyirsə, Azərbaycanın bu iki legitim şərtini qəbul etməlidir”.

Zahid Rza, “İki sahil”