Bu günlərdə bir qrup ABŞ jurnalistinin Azərbaycana səfəri hamımızda xoş ovqat yaradır. Belə səfərləri həmişə gözləmişik. Doğrudur, superdövlətin mətbuatında ölkəmiz barədə məqalələr və xəbərlər dərc olunur, diaspor təşkilatlarımız müəyyən məlumatları yayırlar. Lakin jurnalistlərin burada olmaları, onları maraqlandıran məlumatları birinci əldən almaları böyük əhəmiyyət kəsb edir. Deməli, okeanın o tayındakı mətbuat ordusunun təmsilçiləri ölkəmizə və xalqımıza rəğbət bəsləyir, dövlətimizin xətt-hərəkətini və tutduğu mövqeyi bəyənir.

Bunlarla bərabər, qələm adamları işğalçı Ermənistanın hərbi təcavüzü nəticəsində baş verən Birinci və İkinci Qarabağ müharibələrinin izlərini də görəcəklər. Görəcəklər ki, Ermənistanın işğalçı qoşunları Azərbaycanın şəhər və kəndlərini, necə xarabalığa çeviriblər, məscidləri, qəbiristanlıqları hansı vəhşiliklə dağıdıb təhqir ediblər. Onlarda əminlik yaranacaq ki, ABŞ Konqresində və Senatında ermənipərəst deputatların təzyiqi ilə “Azadlığa Dəstək Aktı”na edilmiş 907-ci düzəliş tamamilə ədalətsizdir. Şübhəsiz ki, qonaq jurnalistlər geriyə zəngin təəssüratlarla qayıdacaqlar. Hələlik onlar görüşlər keçirir, lazımi məlumatlar əldə edirlər. Bizim üzərimizə düşən vəzifə jurnalist qonaqları maksimum səviyyədə zəngin informasiya ilə təmin etməkdir.

Böyük Quruluş Partiyasının (BQP) başqanı, Milli Məclisin İctimai birliklər və dini qurumlar komitəsinin sədri Fazil Mustafa bu gün Amerika Birləşmiş Ştatlarının  ölkəmizdə səfərdə olan media nümayəndələri ilə görüşüb.

Görüş zamanı BQP başqanı jurnalistlərin Azərbaycan-ABŞ münasibətləri, insan hüquqları, ölkədəki dini və ictimai-siyasi vəziyyət, iqtidar-müxalifət münasibətləri, siyasi partiyaların və vətəndaş cəmiyyəti institutlarının mövcud durumu, habelə Ermənistan-Azərbaycan sülh prosesinin perspektivləri ilə bağlı suallarını cavablandırıb.

Fazil Mustafa Azərbaycana xas tolerantlıq və multikulturalizm mühitindən, ölkəmizin sivilizasiyalar və mədəniyyətlərarası dialoq sahəsində tutduğu qabaqcıl mövqedən danışıb. O, Ermənistanın işğalçılıq siyasətinin ağır nəticələrindən bəhs edərək 30 illik işğala, ermənilərin törətdikləri soyqırımı və misli görünməmiş vandalizm aktlarına baxmayaraq, Azərbaycan dövlətinin gələcəyə baxaraq sülh danışıqlarının təşəbbüskarı olduğunu vurğulayıb.

Millət vəkili ölkədə vətəndaş cəmiyyəti institutlarının və siyasi partiyaların fəaliyyəti üçün normal şəraitin mövcud olduğunu, ictimai-siyasi vəziyyətin isə sabit qaldığını qeyd edib.

Fazil Mustafa, həmçinin türk dünyası, Rusiya-Ukrayna müharibəsi, Azərbaycan-Rusiya, Azərbaycan-İran münasibətləri və digər aktual məsələlərlə bağlı da partiyasının mövqeyini jurnalistlərlə bölüşüb.

Görüşdə ABŞ-ın tanınmış jurnalistləri Con Fond, Dennis Lennoks, Corc Landrit, Maykl Mosbaxer, Mettyu Foldi, Skott Morfild, Saul Anuzis, Nikola Medic iştirak ediblər.

İnanırıq ki, amerikalı həmkarlarımız öz ölkələrinə qayıtdıqdan sonra Azərbaycan həqiqətlərini olduğu kimi yayacaq, Amerika ictimaiyyətinə düzgün məlumatlar verəcək, haqlı mövqeyimizi jurnalist mübarizliyi ilə müdafiə edəcəklər.

Vəli İlyasov, “İki sahil”