Almaniya Federativ Respublikasının Prezidenti Frank-Valter Ştaynmayerin Azərbaycana rəsmi səfəri iki ölkə arasında əlaqələrin daha da inkişaf etdirməyə hesablanıb. İstər təkbətək görüşlərdə, istərsə də nümayəndə heyətlərinin iştirakı ilə keçirilən müzakirələrdə ikitərəfli əlaqələrin inkişaf perspektivləri müzakriə keçirilib. Azərbaycan Prezidenti İlham Əliyev bu səfərin münasibətlərə yeni müsbət təkan verəcəyinə inamını ifadə edib: «İki ölkə arasında qarşılıqlı etimad və əməkdaşlıq əsasında formalaşan davamlı siyasi dialoq mühiti mövcuddur ki, bu da strateji maraqların uzlaşdırılmasına, regional və qlobal məsələlər üzrə birgə mövqelərin müəyyən edilməsinə şərait yaradır. Azərbaycan 30 il ərzində erməni işğalından əziyyət çəkmişdir. Beynəlxalq təşkilatların bu məsələyə ciddi müdaxilə etməməsinə baxmayaraq, Azərbaycan beynəlxalq hüququ bərpa edərək münaqişəni öz gücü ilə həll etmişdir. Hazırda Azərbaycan və Ermənistan arasında sülh prosesinin davam etməsi regional təhlükəsizliyin təmin olunması baxımından mühüm əhəmiyyət daşıyır.»
Azərbaycan ilə Almaniya arasında diplomatik əlaqələrin əsası 1992-ci ildən qoyulmuşdur. Belə ki, Almaniya 1992-ci il yanvarın 12-də Azərbaycanın müstəqilliyini tanımış və tərəflər arasında diplomatik münasibətlər 20 fevral 1992-ci il tarixindən başlayaraq formalaşmışdır. Ötən illər ərzində dövlətlər arasında qarşılıqlı maraqlar əsasında siyasi dialoq güclənmişdir.
Dövlətimizin başçısı bəyanatında bu səfərin ikitərəfli əlaqələrə yeni müsbət təkan verəcəyini, iqtisadi sahədə əldə edilmiş nəticələrin bizi təbii olaraq ruhlandırdığını bildirib. İqtisadi sahədə Azərbaycan-Almaniya əməkdaşlığı xüsusilə son illərdə sürətlə inkişaf etmişdir. Cari ilin ilk iki ayında iki ölkə arasında ticarət dövriyyəsi təxminən üç dəfə artmışdır. Bunun səbəbi əsasən xam neftin Almaniyaya ixracının artması ilə əlaqədardır. Gələcəkdə Azərbaycanın Avropaya ixrac imkanlarını artırmaq və investorları cəlb etmək məqsədilə daha çox strateji müqavilələr imzalanacaqdır. Almaniya şirkətləri bu sahədəki təcrübələri ilə dövlətimizin genişlənməkdə olan bərpaolunan enerji proqramlarına dəstək verə bilərlər.
Azərbaycan ötən ilin noyabr ayında COP29 tədbirinə uğurla ev sahibliyi edərək qlobal iqlim siyasətinə ciddi töhfələr vermişdir. Almaniya ilə olan sıx əməkdaşlıq ekoloji məsələlərə daha çox diqqət yetirilməsini təmin edir. COP29-da 197 ölkəni təmsil edən 77 mindən çox iştirakçı qeydiyyatdan keçmişdir və bu konfrans böyük nəticələrlə zəngin idi. Lakin Ermənistanın bu mühüm beynəlxalq konfransda iştirak etməməsi ölkənin regional əməkdaşlıq və iqlim dəyişikliyi məsələlərinə dair qərəzli mövqeyini bir daha nümayiş etdirdi.
Azərbaycan ilə Almaniya arasında siyasi dialoq həm də regional təhlükəsizlik və beynəlxalq münasibətlərə də təsir edir. Ermənistanla Azərbaycan arasında normallaşma prosesi, xüsusilə münaqişənin başa çatmasından sonra regional sülh və sabitlik üçün böyük əhəmiyyət kəsb edir. Dövlətimizin başçısı, həmçinin qeyd etmişdir ki, Azərbaycan 30 il ərzində erməni işğalından əziyyət çəkmişdir: “Bizim xalqımız etnik təmizləməyə məruz qalmışdır. Bir milyon azərbaycanlı erməni aqressiyasına görə evsiz-eşiksiz qalmışdır və torpaqlarımızın təxminən 20 faizi işğal altına düşmüşdür. Əfsuslar olsun ki, beynəlxalq təşkilatlar bu məsələ ilə bağlı ciddi addım atmamışlar. Azərbaycan bu münaqişəni və beynəlxalq hüququ özü döyüş meydanında və siyasi müstəvidə həll etmişdir. Məhz bu tarixi Zəfərimiz sülh danışıqlarına yol açmışdır...”.
Hər iki ölkə arasında möhkəmlənən diplomatik və iqtisadi əlaqələr qlobal səviyyədə də əhəmiyyətli hadisədir. İkitərəfli münasibətlərin davamlı inkişafı müxtəlif sahələrdə yeni əməkdaşlıq perspektivləri açır. Qarşıdakı illərdə bu əməkdaşlığın daha da güclənməsi hər iki ölkəyə qarşılıqlı faydalı tərəfdaşlıq imkanları yaratmaqla yanaşı, qlobal təhlükəsizliyin və dayanıqlı inkişafın təmin olunmasına mühüm töhfə verəcək.
Cənab Frank-Valter Ştaynmayerin ölkəmizə ilk rəsmi səfəri dövlətlər arasında tərəfdaşlığın hərtərəfli və yüksələn xətlə inkişafının əyani göstəricisidir. Əminliklə söyləmək olar ki, bu səfər əməkdaşlığın daha yüksək səviyyəyə qaldırılmasına əhəmiyyətli təkan verəcək, gələcək inkişaf üçün yeni imkanlar yaradacaq.
Nazimə Şamıyeva,
YAP Füzuli rayon təşkilatının sədri
