ABŞ və Ukrayna arasında imzalanmış iqtisadi əməkdaşlıq haqqında niyyət memorandumu çərçivəsində Ukraynanın bərpası üçün investisiya fondunun yaradılması nəzərdə tutulur.

“İki sahil” Ukrayna KİV-ə istinadən xəbər verir ki, sənədin mətni Ukraynanın hökumət portalında dərc edilib.

"Ukraynanın Baş naziri Denis Şmıqal 21 aprel 2025-ci il həftəsində Vaşinqtona (Kolumbiya dairəsi) səfər edəcək. Məqsəd investisiya fondunun yaradılması haqqında sazişin şərtləri ilə bağlı texniki müzakirələri tamamlamaq üçün ABŞ maliyyə naziri Skott Bessentlə görüşməkdir", - sənəddə bildirilib.

Memorandum investisiyalar, infrastrukturun modernləşdirilməsi və iki ölkə arasında qarşılıqlı faydalı tərəfdaşlıq üçün imkanlar açacaq.

Memorandumda həmçinin qeyd olunub ki, ABŞ Ukraynanın Avropa İttifaqına daxil olmaq və ya beynəlxalq maliyyə qurumları və digər rəsmi kreditorlarla sazişlərlə bağlı götürdüyü öhdəliklərə hörmətlə yanaşır.

"Yəni saziş üzərində iş Ukraynanın Avropaya inteqrasiyası yolunda münaqişələrə səbəb ola bilməz", - məlumatda bildirilib.

Qeyd edək ki, memorandumu ABŞ maliyyə naziri Skott Bessent və Ukrayna Baş nazirinin birinci müavini - iqtisadiyyat naziri Yuliya Sviridenko imzalayıblar.