Çərşənbə axşamı Kürasao milli komandası Şimali, Mərkəzi Amerika və Karib Futbol Konfederasiyasının (CONCACAF) seçmə mərhələsinin üçüncü mərhələsində birinci yeri tutaraq tarixində ilk dəfə futbol üzrə dünya çempionatına (DÇ-2026) vəsiqə qazanıb.

“İki sahil”in məlumatına görə, FİFA reytinqində 82-ci pillədə qərarlaşan Kürasao DÇ tarixdə ən az əhalisi olan ölkə olacaq.

Qeyd edək ki, 2023-cü il siyahıyaalmasına görə, adanın əhalisi 155.800 nəfərdir. Bu göstəriciyə görə Kürasao 2018-ci ildə Rusiyada keçirilən dünya çempionatında ilk dəfə çıxış edən və təxminən 400 min nəfər əhalisi olan İslandiyanı geridə qoyur. Həmçinin Kürasao dünya çempionatları tarixində ən kiçik əraziyə malik iştirakçı olacaq — adanın sahəsi 444 kv. km-dir.

Kürasao Niderland Krallığının tərkibinə daxil olan dövlət qurumudur. 2010-cu ilə qədər ada Niderland Antil adalarının bir hissəsi olub.

Məhərrəm Ağalaroğlu, “İki sahil”