Çempionlar Liqasının Liqa mərhələsində 7-ci turun oyunları keçirilir.

“İki sahil” xəbər verir ki, ötən gecə oynanılan 9 görüşdən sonra turnirlə vidalaşacaq iki komanda bəlli olub.

İspaniyanın “Vilyarreal” klubu səfərdə “Ayaks”a 1:2 hesabı ilə məğlub olub. Bu nəticədən sonra “sarı sualtı qayıq” 7 oyundan cəmi 1 xal toplayaraq pley-off mərhələsinə yüksəlmək şansını rəsmi olaraq itirib. Hazırda 24-cü pillədə qərarlaşan və 1/16 finala vəsiqə verən son yerin sahibi “Kopenhagen”dir. Danimarka təmsilçisinin aktivində 8 xal var.

Qazaxıstanın “Kayrat” klubu da Çempionlar Liqasında yoluna davam etmək imkanını itirib. “Brügge”yə 1:4 hesabı ilə uduzan Almatı təmsilçisi də “Vilyarreal” kimi 7 turdan sonra cəmi 1 xal toplayıb.

Turnirdə iştirak edən digər komandaların isə hələ də ümumi mərhələnin yekununda ilk 24-lükdə yer almaq üçün nəzəri şansları qalır.

Xatırladaq ki, 1/8 finala vəsiqəni təmin edən ilk komanda London "Arsenal"ıdır.