Fevralın 11-də Prezident İlham Əliyevin sədrliyi ilə keçirilmiş “Azərbaycanın yeni rəqəmsal arxitekturası” adlı vahid fəaliyyət planına həsr olunmuş müşavirə dövlət idarəçiliyində yeni və strateji bir mərhələnin təməlini qoydu. Müşavirə Azərbaycanın sadəcə texnoloji yeniliklərə adaptasiyasını deyil, həm də ölkənin bütün sahələrdə topladığı gücün rəqəmsal müstəviyə uğurlu transferini nümayiş etdirdi. Ölkə başçısının müşavirədə səsləndirdiyi fikirlər bir daha göstərdi ki, Azərbaycan öz inkişafının keyfiyyətcə yeni, daha mütərəqqi bir mərhələsinə qədəm qoyur. Prezident İlham Əliyevin rəqəmsal transformasiya ilə bağlı müəyyənləşdirdiyi strateji hədəflər dövlətimizin sadəcə texnoloji yenilikləri izləyən deyil, onları yaradan və idarə edən bir güc mərkəzinə çevrilməsini təmin edir.

Müasir dünyada dövlətlərin gücü yalnız onların təbii resursları və hərbi potensialı ilə deyil, həm də texnoloji çevikliyi və rəqəmsal transformasiya qabiliyyəti ilə ölçülür. Dövlət başçısı öz çıxışında rəqəmsallaşmanı sadəcə texnoloji yenilik kimi deyil, ölkənin uzunmüddətli, dayanıqlı inkişafını təmin edəcək əsas prioritet kimi müəyyənləşdirdi. Prezidentin qeyd etdiyi kimi, süni intellektin tətbiqi, data mərkəzlərinin yaradılması və rəqəmsal islahatlar bu gün ölkələrin gələcək inkişaf modelini şərtləndirən başlıca amillərdir. Rəqəmsallaşma artıq bir seçim deyil, dövlət idarəçiliyinin şəffaflığını, operativliyini və vətəndaş məmnunluğunu ən yüksək səviyyəyə çatdıracaq yeni idarəetmə fəlsəfəsidir. Bu gün aparıcı ölkələrdə dövlət məmurlarının gündəlik fəaliyyətində süni intellekt agentləri qərar qəbuletmə prosesinə dəstək verir. Bu texnologiyalar böyük həcmli məlumatları təhlil edərək daha dəqiq, əsaslandırılmış və operativ qərarların qəbuluna kömək edir. 

Rəqəmsal arxitekturanın əsas hədəfi vətəndaş məmnunluğudur. Prezidentin çıxışı həm də kadr potensialının və insan kapitalının inkişafı üçün ciddi çağırışdır. Süni intellekt agentlərinin dövlət məmurlarının gündəlik fəaliyyətinə kömək göstərməsi ideyası dövlət idarəçiliyində keyfiyyətcə yeni bir mərhələnin anonsudur. Bunun nəticəsində də dövlət qurumları arasında məlumat bazalarının inteqrasiyası və koordinasiyanın gücləndirilməsi bürokratik maneələri aradan qaldıracaq, şəffaflığı artıracaq və qərar qəbuletmə prosesini operativləşdirəcəkdir.

Müşavirədə diqqət çəkən ən mühüm məqamlardan biri Azərbaycanın mövcud infrastruktur üstünlüklərinin rəqəmsal müstəviyə transferidir. Yeni rəqəmsal arxitektura qeyri-neft sektorunun sürətli inkişafına, innovativ sahibkarlıq mühitinin genişlənməsinə və ölkəmizin qlobal iqtisadi rəqabətdəki mövqeyinin güclənməsinə xidmət edir. Ölkəmiz neft-qaz və nəqliyyat dəhlizləri sahəsindəki nəhəng təcrübəsini indi fiber-optik dəhlizlər və regional data mərkəzləri qurmaq üçün istifadə edəcək. Bu, Azərbaycanın coğrafi mövqeyini rəqəmsal iqtisadiyyatda mühüm geostrateji üstünlüyə çevirmək strategiyasıdır.

Müşavirə göstərdi ki, Azərbaycanın enerji, nəqliyyat və logistika sahəsində qazandığı beynəlxalq nüfuz artıq ölkənin yeni rəqəmsal imicinin formalaşması üçün möhkəm təməl rolunu oynayır. Ölkəmizin malik olduğu əlverişli coğrafi mövqe və siyasi sabitlik indi “rəqəmsal mərkəz” hədəfinə xidmət edən əsas strateji üstünlüklərə çevrilir. Nəticə olaraq, bu müşavirə və qəbul edilən vahid fəaliyyət planı Azərbaycanın 21-ci əsr vizyonunun parlaq ifadəsidir. Müşavirə bir daha sübut etdi ki, cənab prezidentin rəhbərliyi ilə həyata keçirilən islahatlar hər bir vətəndaşın rifahına, dövlətimizin milli təhlükəsizliyinin qorunmasına və Azərbaycanın modern bir dövlət kimi dünya birliyindəki nüfuzunun artmasına hədəflənmişdir.

Anar MƏMMƏDOV

Milli Məclisin deputatı