Çin iqtisadiyyatın karbon intensivliyini 17 faiz azaltmağı hədəfləyən 2026-2030-cu illər üzrə yeni beşillik iqlim planını təqdim edib. Sənəddə əsas diqqət bərpaolunan enerjinin inkişafına və kömürdən asılılığın azaldılmasına yönəldilib.

“İki sahil” CGTN Çin televiziya kanalına istinadən xəbər verir ki, plan ölkənin əsas iqtisadi planlaşdırma orqanı olan Milli İnkişaf və İslahat Komissiyası tərəfindən dərc edilib. Strategiyaya əsasən, hər il təxminən 30 milyon ton kömür bərpaolunan enerji mənbələri ilə əvəz olunacaq.

Çin hazırda dünyanın ən böyük bərpaolunan enerji bazarıdır. 2024-cü ilin sonuna qədər quraşdırılmış bərpaolunan enerji gücü 1,89 teravatta, o cümlədən 887 QVt Günəş, 521 QVt külək və 436 QVt SES gücünə çatacaq. 2025-ci ilə qədər günəş və külək elektrik stansiyalarının ümumi gücü 1,8 teravatta çatacaq ki, bu da ölkənin ümumi elektrik şəbəkəsi gücünün təxminən yarısını təşkil edəcək.

Ekspertlər qeyd edirlər ki, Çin istixana qazı tullantılarının ən böyük mənbəyi olaraq qalır və elektrik enerjisi istehsalı üçün kömürdən fəal istifadəyə davam edir. Ölkə hakimiyyəti kömür istehlakını birbaşa məhdudlaşdırmadan iqtisadiyyatın enerji intensivliyini və karbon qazı tullantılarını idarə edən “ikili nəzarət” mexanizmlərinə diqqət yetirir.

Pekin bundan əvvəl 2030-cu ilə qədər CO₂ emissiyalarının pik həddə çatmasını və 2060-cı ilə qədər karbon neytrallığına nail olmağı hədəfləyirdi. Əvvəlki beşillik dövrdə iqtisadiyyatın karbon intensivliyi planlaşdırılanın əksinə, 18 faiz deyil,12 faiz aşağı düşüb.