ABŞ Prezidenti Donald Tramp bildirib ki, rəsmi Vaşinqton Tehranın zənginləşdirilmiş urandan imtina etməsi müqabilində İrana qarşı sanksiyaları yumşaltmaq niyyətində deyil.

“İki sahil” xəbər verir ki, o, bu mövqeyi PBS yayım şirkətinə müsahibəsində açıqlayıb.

"Xeyr, bu, qətiyyən belə deyil. Sanksiyaların heç bir yumşaldılması olmayacaq", - ABŞ lideri sazişin mümkün şərtləri ilə bağlı suala cavabında bildirib.

Xatırladaq ki, fevralın 28-də ABŞ və İsrail İrana qarşı hərbi əməliyyatlara başlayıb və bir sıra şəhərlərə hava zərbələri endirilib. Həmin gün zərbələr nəticəsində İranın Ali rəhbəri Əli Xamenei öldürülüb. İran buna cavab olaraq İsrail ərazisinə və Fars körfəzi ölkələrindəki ABŞ hərbi bazalarına hücum edib.

İran, ABŞ və onların müttəfiqləri aprelin 8-ə keçən gecə atəşkəs razılaşmasına nail olublar. Tramp sonradan atəşkəsi qeyri-müəyyən müddətə uzadıb.

Tərəflər münaqişəni həll etmək üçün Pakistanda danışıqlar aparıblar, lakin 11-12 apreldə keçirilən ilk raund heç bir nəticə verməyib.

ABŞ Tehrana təzyiq göstərmək üçün İran limanlarını və Hörmüz boğazından keçidi blokadaya alıb. İran da öz növbəsində Fars körfəzinə gedən gəmilər üçün Hörmüz boğazının bağlandığını elan edib. Regionda dinamik şəkildə dəyişən vəziyyət qlobal enerji böhranına səbəb olub.