Birləşmiş Ərəb Əmirlikləri hakimiyyəti ölkənin hava məkanında əvvəllər qüvvədə olan uçuş məhdudiyyətlərini 23 iyun tarixinə qədər uzadıb.

“İki sahil” xarici mediaya istinadla xəbər verir ki, BƏƏ hava limanlarına və onlardan uçuşlar üçün altı dəhliz və hava sərhədi keçid məntəqəsi ayrılıb. Mayın 5-də BƏƏ hakimiyyəti xarici aviaşirkətlərə ölkəyə uçuşlar zamanı potensial əməliyyat risklərini qiymətləndirməyin vacibliyi barədə xəbərdarlıq edib. Uçuşları həyata keçirmək üçün daşıyıcılar riskləri qiymətləndirməli, sorğu təqdim etməli və tələb olunan bildirişi gözləməlidirlər. Bu prosedur repatriasiya uçuşlarına, tibbi uçuşlara və ya dövlət uçuşlarına şamil edilmir.

Mülki aviasiyanın məhdudlaşdırılması qərarı İranın İsrailə raket atmasından sonra verilib. Suriya da hava məkanının qismən bağlandığını və Dəməşq hava limanında əməliyyatların dayandırıldığını elan edib. Bu günortadan sonra İran Silahlı Qüvvələri İsrailə qarşı əməliyyatlarının başa çatdığını elan edib.