Florensiyanın San-Marko monastırının arxivində Boliviyanın koka yarpaqları və kola fındığından hazırlanan tətbiqi-tonuslandırıcı çaxır eliksirinin təsviri olan buklet aşkar edilib. Bu tapıntı məşhur Amerika içkisinin mümkün İtaliya sələfi haqqında fərziyyələrin yaranmasına səbəb olub.

“İki sahil” xəbər verir ki, bu barədə "Kommersant" məlumat yayıb.

Kilsənin baş keşişi Manuel Russo ehtimal ki, XIX əsrin sonlarına aid olan sənəddə 10 qram koka yarpağı və 30 qram kola fındığının çaxırla qarışdırılmasının tövsiyə edildiyini bildirib. Məhsul xəstəliklərdən sonra bədəni və zehni bərpa edən, həmçinin qocalma ilə mübarizə aparan vasitə kimi reklam olunub. O dövrdə rahiblər missionerlərin 1961-ci ildəki qlobal qadağadan xeyli əvvəl Boliviyadan gətirdikləri koka ilə fəal ticarət edirdilər.

Bu tərkib əczaçı Con Pembertonun 1886-cı ildə hazırladığı şərbətlə gözəçarpan dərəcədə oxşardır — hərçənd o, yerli spirtli içki məhdudiyyətlərinə görə çaxırı qazlı su ilə əvəz etmişdi.

Ata Russo ehtiyatlı olmağa çağırır və "Coca-Cola" resepti ilə birbaşa əlaqəni sübut edən faktların olmadığını vurğulayır. "Coca-Cola şirkətinin məni məhkəməyə verməsini istəməzdim", - deyə o zarafatla qeyd edib. Onun sözlərinə görə, o dövrdə İtaliya və Fransada koka əsaslı dərmanları bir çox qurumlar istehsal edirdi. Tapılan digər sənədlər monastır eliksirinin böyük məşhurluğundan xəbər verir — qiymət 2-dən 6 İtaliya lirəsinə qədər dəyişirdi ki, bu da bu gün 1 sentdən də azdır. "Koka yarpaqları qadağan edilənədək bu, bizim ən çox satılan məhsullarımızdan biri idi", — deyə Russo əlavə edib.

Aptekin özü monastırın nəzdində 1460-cı ildə açılıb, indiyədək fəaliyyət göstərir.