İtaliyanın keçmiş baş nazir Cüzeppe Kontenin rəhbərlik etdiyi və hazırda müxalifətdə olan İtaliyanın "5 Ulduz" Hərəkatı Ukraynaya yardımın göstərilməsinə son qoyulmasını təsdiq edərək "Nova" seçki proqramını qəbul edib.

“İki sahil” xəbər verir ki, bu barədə "Il Fatto Quotidiano" qəzeti məlumat yayıb.

Onun məlumatına görə, bazar günü Milanda keçirilən qurultayda proqramın 159 bəndinə partiyanın səsvermə hüququ olan təxminən 45 min üzvü, yəni seçicilərin 42%-i səs verib. Səs verənlərin 91,7%-i Ukraynaya silah göndərilməsinin yalnız münaqişəni uzatması və bu yardımın dayandırılması ilə razı olduğunu bildirib. 94,1%-i isə Avropanın yenidən silahlandırılması planlarının əleyhinə çıxış edib.

Hərəkat hazırlanan proqram əsasında Demokratik Partiya və Yaşıllar və Solçular Alyansı ilə koalisiya təklif edir. Eyni zamanda, Konte qeyd edib ki, Ukraynaya silah tədarükü məsələsində sərt mövqe qorunub saxlanılır. Halbuki Demokratik Partiya onları davam etdirməyə hazırdır. Bununla belə, Demokratik Partiyanın katibi Elli Şlayn bildirib ki, onun partiyası Konte tərəfindən təklif edilən və gələcək koalisiya üçün əsas ola biləcək proqramın bir çox bəndini bölüşür. Lakin onun sözlərinə görə, Ukrayna məsələsində kompromis tapmaq lazımdır.

İtaliyada növbəti parlament seçkiləri bir ildən sonra keçirilməlidir, lakin onların daha erkən tarixə keçirilə biləcəyi də istisna olunmur.