Türkdilli ölkələr arasında əməkdaşlığı təşviq etmək məqsədi ilə beynəlxalq miqyasda fəaliyyət göstərən Türk Şurasının iqtisadiyyat nazirlərinin 10-cu zirvə görüşü Bakıda keçirilmişdir. Görüşdən sonra keçirilən Türk Biznes Mükafatlarının Təqdimolunma Mərasimində SOCAR-ın Türkiyədəki törəmə müəssisəsi olan “SOCAR Türkiyə” "Türk Şurası İnvestisiya Mükafatı”na layiq görülüb.
“İki sahil” xəbər verir ki, Şuraya üzv olan ölkələrdə investisiyaların artırılmasında mühüm rol oynayan şirkətlərin dəyərləndirildiyi mərasimdə “SOCAR Türkiyə” strateji sektorlara qoyulan böyük miqyaslı investisiyalarına görə mükafata layiq görülmüşdür. Üzv ölkələr Azərbaycan, Qazaxıstan, Qırğızıstan, Özbəkistan, Macarıstan və Türkiyənin iqtisadiyyat və ticarət nazirlərinin iştirak etdiyi toplantıda Türkiyənin Ticarət naziri Mehmet Muş “SOCAR Türkiyə”-nin mükafatını şirkətin Kommunikasiya və dövlət ilə əlaqələr üzrə rəhbəri Mikayil Yusifova təqdim etmişdir.
Türk Biznes Mükafatları Türkiyə Respublikası Prezidentinin nəzdində İnvestisiya Ofisi və Ticarət Nazirliyinin qərarı ilə Türkiyəyə investisiya yatıran şura üzvü ölkələrin şirkətləri arasında aparılan dəyərləndirməyə əsasən verilir. Təsisiçiləri arasında Azərbaycan və Türkiyənin də olduğu Türk Şurası, üzv ölkələr arasında iqtisadi əməkdaşlığın genişləndirilməsi ilə yanaşı türk dünyasının tarixi və mədəni irsinin qarşılıqlı mübadiləsi və inkişafı istiqamətində layihələr də həyata keçirir.
“TÜRK DÜNYASININ GƏLƏCƏYƏ İSTİQAMƏTLƏNƏN YOLUNDA GÜCLÜ ADDIMLARLA İRƏLİLƏMƏYƏ HAZIRIQ”
Layiq görüldükləri “Türk Şurası İnvestisiya Mükafatı”nı dəyərləndirən “SOCAR Türkiyə” Kommunikasiya və dövlət ilə əlaqələr üzrə rəhbəri Mikayıl Yusifov demişdir: “Türk Şurası eyni dildə danışan, eyni idealları bölüşən ölkələrimizin potensialını bütün dünyaya çatdıran güclü ittifaqdır. Bu ittifaq iqtisadi əməkdaşlıqla yanaşı əhatə dairəsini genişləndirərək türk dövlətləri arasında sosial və mədəni əlaqələrin də inkişafına töhfə verir. Türk dünyasına təqdim etdiyi vizyonla dövlətlərimizi və xalqlarımızı ümumi dəyərlərimiz ətrafında birləşdirərək gələcəyə aparır. “SOCAR Türkiyə” olaraq türk dünyasının gələcəyə gedən bu yolunda hər zaman güclü addımlarla irəliləməyə hazırıq. Türkiyədəki investisiyalarımız yalnız Azərbaycan və Türkiyə deyil bütün türk dünyası üçün strateji əhəmiyyət daşıyır. Bu baxımdan Türk Şurası tərəfində belə bir mükafata layiq görülməyimiz bizim üçün bir mükafatdan daha böyük məna kəsb edir. Fəaliyyətimizi izləyən və təqdir edən Türk Şurasına və üzv ölkələrə “SOCAR Türkiyə” olaraq dərin minnətdarlığımızı bildiririk.”
