İngilislər öz milli adət-ənənələrinə sadiq olan insanlar kimi tanınmaqdadır. Böyük Britaniyanın müxtəlif yerlərindən olan insanların qeyri-adi ənənələri haqqında məlumatları təqdim edirik.
Merin çəkisini ölçürlər
1937-ci ildən bəri Bukingemşir ştatının Hay-Vikom şəhərində mer və onun müşavirlərinin çəkisini çəkmək adət halına gəlib. Bu şəhərdə may günlərinin birində şəhər sakinləri bələdiyyə binasına toplaşaraq məmurların çəkilərini ölçürlər.
Burada yaşayan insanların düşüncələrinə görə məmurların çəkisi tez artırsa, deməli onların əlləri təmiz deyil. Bu cür halda bələdiyyə sədri və onun komandası işdən azad edilir. Lakin tutduğu vəzifədən azad edilmədən öncə o, məsxərəyə qoyulur və onun üzərinə insanlar tərəfindən çürük tərəvəz, meyvə və yumurta qalıqları atılır.
Pendir yarışı
Hər il İngiltərənin Qlosterşirdə yerləşən Kupers Hill qəsəbəsində əyləncəli və travmatik yarışlar keçirilir. Bu yarışda kifayət qədər sıldırım dağdan bir baş pendir iştirakçılara tərəf atılır. Pendiri tuta bilən iştirakçıya xüsusi mükafat verilir.
Qeyd edək ki, yarışlar əyləncə xatirinə keçirilsə də, lakin həmin gün xəsarət alanlar da olur. Bədbəxt hadisə nəticəsində boynunu qıran bir iştirakçıya görə, bu yarışlar 2010-cu ildə qadağan edilsə də, lakin buna baxmayaraq son illərdə qeyri-rəsmi şəkildə keçirilməyə davam edir.
Həyat yoldaşı ilə qaçış
Surrey ştatının Dorkinq şəhərində uzun müddətdir ki, bəyin həyat yoldaşını qucağına alaraq qaçmağı artıq bir ənənəyə çevrilib. Səbəbi məlum olmayan bu qeyri-adi qaçış növü yerli əhali tərəfindən çox sevilir. Burada yaşayan insanların düşüncələrinə görə bu adət bədəni və ruhu gücləndirir. Bildirilir ki, Dorkinqdə yaşayan kişilər həyat yoldaşlarını çiyinlərinə götürərək ən azı 400 metr qaçmalıdırlar.
Çörəyin paylanılması
Bizə uşaqlıqdan çörəyin müqəddəs olduğunu və onu heç bir halda atmamağı öyrədiblər. Lakin Oksfordşir ştatının Abingdon əhalisi bunu nədənsə edirlər. Burada orta əsrlərdən bəri şəhər merləri kral ailəsində baş verən əlamətdar hadisələri qeyd edərək şəhər qalasının qülləsindən sıravi vətəndaşların üzərinə çörək atırlar. Onların düşüncələrinə görə, beləliklə onlar çörəyi yoxsullara paylamış olurlar. Əgər əvvəllər bu tədbirdə yalnız kasıblar iştirak edirdisə, bu gün çörəyin paylanmasına bütün şəhər sakinləri və turistlər toplaşır.
Toyuq yarışları
Artıq 100 ildir ki, Derbişirin Bonsolle kəndində ev toyuqları üçün yarışlar keçirilir. Həmin yarışma mütləq sakit bir yerdə baş verir ki, "idmançıların" diqqəti yayınmasın. Çox maraqlıdır ki, yarışda qonşu kəndlərdən gətirilən toyuqlar da iştirak edir.
Palçıq arxında üzmək
Llanurthyd Vells bataqlığı hər il burada keçirilən üzgüçülük yarışı ilə ziyarətçiləri cəlb edir. Palçıq arxında üzən iştirakçılar xüsusi maskalar və digər avadanlıqlar ilə təmin olunurlar.
Ən gülməli üz
Egremontun sakinləri hər il toplaşaraq qeyri-adi mərasim keçirirlər. Həmin mərasimin qaydalarına görə, üzünü ən gülməli formaya salan iştirakçı mütləq mükafatlandırılır.
Torpaq qurdlarını çıxarmaq
"Wormcharming" adlı çox qeyri-adi bir yarışma Devonun Blekton əhalisi tərəfindən illər boyunca keçirilməkdədir. Bu yarışmanın qaydalarına görə, torpaqdan qurdu ən tez çıxaran şəxs qalib olur.
Saman ayısının yürüşü
Hər il Kembricşir ştatının Utlesi şəhərində keçirilən festival bir çox insanların marağına səbəb olub. Belə ki, həmin gün samandan hazırlanmış ayı kostyumunda bir insan şəhərin küçələrində keçirilən bayram yürüşündə iştirak edir. Parad mahnı və rəqslərlə axşama qədər müşayiət olunur. Sonunda isə hamının müşayiəti ilə samandan hazırlanmış kostyum yandırılır.
Gicitkanı kim yeyəcək?
Dorset ştatının Marşvud şəhərində baş tutan qeyri-adi hadisə 30 ildən artıqdır ki, hər il keçirilir. Müsabiqə zamanı münsiflər heyətinin nəzarəti altında gicitkan iştirakçılar tərəfindən yeyilir. Bu yarışın yaradıcısı ötən əsrin 80-ci illərinin ortalarında gicitkan kolunu cəsarətlə yeyən yerli sakindir. Qeyd etmək lazımdır ki, Marşvudda keçirilən bu yarış bir çox ölkələrdə də keçirilməyə başlayıb.
Yanan çəlləklər ilə qaçış
Otteri St Meri Devon qəsəbəsində 1605-ci ildən məşhurlaşan və zibil, kağız və saman qarışığı ilə doldurulmuş yanan çəlləklə qaçmaq ənənəsi mövcuddur. Bu qaçış çox təhlükəlidir, çünki yanan çəlləklər çiyinlərdə daşınmalı və yerə yuvarlanmamalıdır.
Samirə Tağıyeva, “İki sahil”
