Birləşmiş Millətlər Təşkilatı bildirib ki, ölkələr profilaktika və müalicəyə sərmayə qoymaq və ayrı-seçkiliyə yol verməyən qanunlar qəbul etmək üçün siyasi iradə nümayiş etdirsələr, 2030-cu ilə qədər QİÇS-ə son qoymaq mümkündür. Birləşmiş Millətlər Təşkilatının QİÇS proqramı olan UNAIDS-a görə, 2022-ci ildən dünyada təxminən 39 milyon insan QİÇS ilə yaşayır.

Xatırladaq ki, İnsan İmmun Çatışmazlığı virusu (İİV) müalicə olunmazsa, QİÇS xəstəliyi yarana bilər. UNAIDS-in cümə axşamı dərc etdiyi hesabatda deyilir: "İnsanları ön plana qoymaq və sübuta əsaslanan İİV-in qarşısının alınması və müalicəsi proqramlarına sərmayə qoymaq üçün güclü siyasi öhdəlik götürən ölkələrin tövsiyələrinə əməl etsək, həllimiz var".

İİV-ə qarşı effektiv mübarizə üsulu digər təşəbbüslər arasında ayrı-seçkiliyə yol verməyən qanunların qəbul edilməsi və icma şəbəkələrinin gücləndirilməsidir. Bir çox ölkələrdə İİV və ya QİÇS-lə yaşayan insanlar stiqma, ayrı-seçkilik və zorakılıqla üzləşirlər. "İrəliləyiş ən çox maliyyə sərmayələri olan ölkələr və regionlarda, məsələn, 2010-cu ildən bəri yeni İİV infeksiyalarının 57% azaldığı Şərqi və Cənubi Afrikada müşahidə olunub", - hesabatda deyilir.

Bununla belə, əfsuslar olsun ki, Şərqi Avropa və Mərkəzi Asiyada, həmçinin Yaxın Şərq və Şimali Afrikada yeni infeksiyaların sayı kəskin artıb.

UNAIDS-in məlumatına görə, keçən il 1,3 milyon insan İİV-ə yeni yoluxub və 630 min nəfər QİÇS-lə əlaqəli xəstəliklərdən dünyasını dəyişib.

Nubar Süleymanova, “İki sahil”