Ötən il Türkiyənin müdafiə və aviasiya sahəsi üzrə ən çox ixrac əməliyyatı edən 10 şirkəti açıqlanıb. “Baykar”ın liderlik etdiyi siyahıda TUSAŞ, ASFAT, Makina və Kimya Sənayesi (MKE), ARCA Müdafiə, TUSAŞ Mühərrik, ASELSAN, RAM Xarici Ticarət, ROKETSAN və Samsun Yurt Müdafiə kimi şirkətlər yer alıb.
“İki sahil” xəbər verir ki, Türkiyənin Prezident Administrasiyasının Müdafiə Sənayesi Baş İdarəsi tərəfindən açıqlanan siyahıya görə, 1,8 milyard dollar dəyərində ixracatla siyahının birinci sırasında olan “Baykar”ı, 750 milyon dollarla TUSAŞ Aviasiya, 644 milyon dollarla isə ASFAT şirkəti izləyir.
“Baykar” şirkəti ötən il gəlirlərinin 90 faizini ixracatdan əldə etdiyini bildirib.
Qeyd edilib ki, 2003-cü ildə PUA AR-GE (Pilotsuz Uçuş Aparatı Araşdırma və Təkmilləşdirmə) prosesinin başlamasından bu günə qədər bütün layihələrini öz resursları ilə həyata keçirən “Baykar”, əldə etdiyi ümumi gəlirinin 83 faizini ixracatla təmin edib.
“Baykar”ın baş direktoru Haluk Bayraktar açıqlamasında rəhbərlik etdiyi şirkətin 2024-cü ildə əldə etdiyi bu nailiyyətlə dünya SİHA (Silahlı PUA) ixracat bazarının lideri olduğunu vurğulayıb.
2023-cü ildə ölkənin sənaye ixracatının üçdə birinə imza atan “Baykar” 2024-cü ildə müdafiə və aviasiya sektorunun ümumi ixracatının dörddə birini həyata keçirərək, Türkiyəni qlobal SİHA ixracat bazarında lider mövqeyə gətirib. “Baykar”ın dünya miqyasında əldə etdiyi bu uğur sayəsində Türkiyə SİHA ixracatında ABŞ, İsrail və Çin kimi ölkələri qabaqlayıb. Yeni Amerika Təhlükəsizlik Mərkəzi - CNAS-ın ötən ilin sentyabr ayında yayımladığı hesabata görə, Türkiyə dünya İHA ixracat bazarının 65 faizinə sahibdir. Ən yaxın rəqibi ABŞ şirkətinin üç qat böyüklüyündə olan “Baykar” son 4 ildir dünyanın bir nömrəli SİHA istehsalçısı olaraq ixracat bazarının təxminən 60 faizinə hakimdir.
Qlobal miqyasda fəaliyyətini artırmağa davam edən “Baykar”ın hazırda imzalanmış müqavilələrinin 97,5 faizi ixracatdan qaynaqlanır. Şirkət tərəfindən istehsal olunan “Bayraktar TB2” SİHA və “Bayraktar AKINCI” TİHA (Hücum Pilotsuz Döyüş Aparatı) ümumilikdə 35 fərqli ölkəyə ixrac edilib.
“Bayraktar TB2” dünya miqyasında 34 ölkənin inventarına daxil olub.
