ABŞ Prezidenti Donald Trampın tətbiq edəcəyi gözlənilən yeni tariflər, Şimali İrlandiyadan ABŞ-a ixrac edilən mallara 20 faizlik vergi tətbiq olunacağı təqdirdə, yerli şirkətlərə satış itkisi baxımından azı 100 milyon funt-sterlinqə başa gələ bilər.

“İki sahil” “BBC”yə istinadla xəbər verir ki, bu barədə Ulster Universitetinin iqtisadçısı Esmond Birni qiymətləndirmə aparıb.

Böyük Britaniya hökuməti ABŞ-dan azadolma almağa çalışsa da, artıq tariflərin tətbiq olunacağı gözlənilir. 2023-cü ildə Şimali İrlandiya ABŞ-a ümumilikdə 1.3 milyard funt-sterlinq dəyərində mal ixrac edib. Bu malların əsas hissəsini əczaçılıq məhsulları və sənaye avadanlıqları təşkil edib.

Esmond Birni hesab edir ki, 20 faizlik tarifin birbaşa və məhdud təsiri satışlarda 100 milyon funt-sterlinq azalmaya səbəb ola bilər. İkinci və üçüncü mərhələli təsirlər – məsələn, qlobal ticarətin ümumi azalması isə mənfi təsirin ümumi miqyasını 200-300 milyon funt-sterlinqə qədər yüksəldə bilər.

“100 milyonluq azalma belə, ümumi iqtisadi göstəricilərə ciddi təsir edə bilər. Bu, Şimali İrlandiyanın təxminən 50 milyard funt-sterlinq olan ÜDM-nin yalnız 0,2 faizini təşkil etsə də, yenə də ciddidir”,- deyə E. Birni vurğulayıb.