19 oktyabr 2025-ci il tarixdə Yeni Azərbaycan Partiyası Masallı rayon təşkilatı və Masallı Tarix-Diyarşünaslıq Muzeyinin birgə əməkdaşlığı ilə Yeni Azərbaycan Partiyasının 33-cü ildönümünə həsr olunmuş "Azərbaycan qəhrəman və işgüzar qadınlar yurdudur" mövzusunda tədbir keçirilib.
“İki sahil” xəbər verir ki, Masallı Tarix-Diyarşünaslıq Muzeyində keçirilən tədbirdə Şəhid anaları, YAP-ın rayon təşkilatının veteran qadınları və fəal gənclər iştirak ediblər. Tədbiri Ümummilli Lider Heydər Əliyevin və bütün şəhidlərin əziz xatirəsinin bir dəqiqəlik sükutla yad edilməsi ilə açan Muzeyin direktoru Əntiqə Tağıyeva tədbirin məqsəd və məramından danışdı.
İlk olaraq YAP Masallı Rayon Təşkilatının sədri Seyfəddin Əliyev mövzu ilə bağlı geniş məruzə edib. O, məruzəsində Azərbaycanın Müstəqillik dövründə Ulu Öndər Heydər Əliyevin eyni zamanda YAP-n siyasi və iqtisadi fəaliyyəti haqqında danışdı. Bu çətin və mərhələli inkişaf tarixində Azərbaycan qadınının daima cəmiyyətin inkişafında mühüm rol oynadığını, xüsusilə müasir dövrdə qadınların dövlət idarəçiliyində, təhsildə, elm və sosial həyatda yüksək fəallıq göstərdiyini vurğulayıb. Seyfəddin Əliyev həmçinin şəhid analarının və ailələrinin əzmkarlığını, dövlətimizin onlara göstərdiyi diqqət və qayğının önəmini xüsusi qeyd edib.
Şəhid Nurlan və İntiqam Əsgərlinin anası Ziba xanım öz çıxışında qadınlarımızın üzərinə düşən məsuliyyətdən danışıb, şəhid analarının göstərdiyi iradənin Azərbaycan qadınının əsl simvolu olduğunu vurğulayıb. O deyib ki, bu gün qadınlar təkcə ailədə deyil, həm də ictimai həyatda yenilikçi və təşkilatçı kimi ön sıralardadırlar.
Sonra tədbirdə çıxış edən Həsənli kənd uşaq bağçasının direktoru , YAP veteranı Nazilə Hüseynova və Mina Quliyeva Azərbaycan qadınının həm ailədə, həm də cəmiyyətdə nümunəvi mövqeyindən söz açdılar. Qızların təhsilinə xüsusi önəm verildiyini, gənc nəsildə vətənpərvərlik ruhunun gücləndirilməsinin əsas hədəflərdən biri olduğunu bildirən çıxışçılar bu yolda özlərinin istifadə etdikləri təcrübə və tövsiyələrini gənclərlə bölüşmüş oldular.
Daha sonra Masallı Dövlət Regional Kollecinin müəllimi, YAP-n gənc fəal üzvü Humay Əliyeva və başqaları çıxışlarında gənclər arasında sağlam düşüncə, vətən sevgisi və sosial fəallığın artırılmasının vacibliyini qeyd edib. O, Azərbaycan qadınlarının həm təhsildə, həm də elmi fəaliyyətlərdə mühüm nailiyyətlər qazandığını, bu uğurların dövlət siyasətinin nəticəsi olduğunu bildirib.
Tədbir qarşılıqlı fikir mübadiləsi, Şəhid analarına diqqət, qadınların ictimai rolunun dəyərləndirilməsi ilə yadda qalıb.
